تقليب المواجع

معك طعم المسا غير ومعك حتى السوالف غير
معك يا حلو تقليب المواجع بين كفينك





تبختر بين دقّات الخفوق ونشوة التفكير
ترى كل الحياة أصغر من اللي بيني وبينك





احس انّك تجي والعشب ينبت والطيور تطير
واحس ان السحاب يلوح براقه على يدينك





احس بروعة الدنيا واحس ان الزمان بخير
واحسك للحياة اعذب نداء ما انت بمثل عينك





اشوف الصبح لا شال الشفق هز الظلام عصير
واشوف الورد يضحك ما بقى الا ينشدك وينك






واشوف الريح تقبل مستخفه دمّها وتغير
تنثّر لك شعرك وتنتثر سلة رياحينك





ورا ما ترقص القمرا بقلبٍ خانه التعبير
مثل ما ترقص الألوان في مسرح فساتينك





دخيل انشودة العشاق وذنبٍ يرفض التكفير
دخيل آخر ربيع ٍ مرّني في حضن عشرينك





أنا اللي نزلك من برجك العاجي وجاك يسير
يمد لك اليمين ولا درى عن لهفة يمينك





واثرك تشوفني في حلمك اللي في رجا التفسير
على ذاك الحصان لابيض اللي في ميادينك





شعرت بطعم سكينك من اول ما بدا التقدير
تمثنيت العروق وقبّل اكبر جرح سكينك





لقيتك قبل ما ابحث عنك في الأبراج والتبصير
قريتك قبل اموت بلذّة قرايت فناجينك





ابي للناس أسولف بك واقول اللي يصير يصير
واحسك سالفه لو سولفوها شوهو زينك





حشا لو تطري الفرقا ما عدك راعي التقصير
عزاي إني ملكت بوقتها عرش أجمل سنينك





يقولون الزمان اغبر وأنا اقول إن الزمان بخير
مادام اللي سكن في ناظرك ماطاح من عينك