المشرف (( عبدالله الزومان)) على كرسي الاعتراف

(( الاخ الفاضل استاذي سرحان ))
عبد الله الزومان
اخووووي
عبد الله
حياااااك الله طال عمرك منور الكرسي
سلام الله على الزومان سلامٍ مانصي غيره
سلامٍ مثل وبل المزن واحلى من حليب النوق
الغالي
يقولون من طول الغيبه جاب الغنايم
وان شاء المانع خير
بس ماودنا بغيبتك مره ثانيه طال عمرك
ماعندي سؤال
بس ودنا بالجوهر المكنون
ودنا تتحفنا بالجديد ترى متشوقين لك ولجديدك
لك الغلا
اخوووك
سرحان
&&&&&&&&&&&&

هلا بك يا سمي الذيب هلا يا طيـّب السيرة
يشرفني ارد البيت واثني للرجال حقوق


ابشر بالغـنايم يالذيب
وآآآسف مره ثانية يا سرحان ماعاد نطول الغيبات

ولك مني صادق المحبة

ولك وللجميع من الاعضاء والاصدقاء والجمهور المتشوقين للشعر
اهديكم هذه القصيدة المتواضعة والتي ستنشر قريباً في جريدة الرياض وقد سجلتها في قناة الساحة والقصيدة بعنوان :

{{ رحــلة التــاريخ ْ}}


يارحلة التاريخ نحتاج تفسير == فك المشفر والامور الغريبه
ان قلت شاعر : قات مامن شواعير == وان قلت راهب : والله انه مصيبه
وش عندنا غير القلم والطباشير == يوم افختت يدنا حبال النجيبه
البورصة بانت عليها المخاسير == والليلة الضلما بدأ ينحكيبه
ماهي رواية مسرحية شكسبير == ولاهي طلاسم كاهنٍ شق جيبه
ما بين حد المطرقة ونافخ الكير == صرنا نشوف المخطية والمصيبه
نقضي الليالي متابعة للفوازير == ولا ندري ان بتالي الوقت خيبه
ونرسم خطوط العرض جملة دواوير == للهندسة قانون لازم نجيبه
آخر زمن كله موسيقى وتزمير == صخب يجيب صداع للي بليبه
ان قلت مخطي ما تفيد المعاذير == لا زومعت بيّن جفاه لصحيبه
في صك غفران الذنوب المكابير == في ليلة الغفران يولد نصيبه
لو سادت السادات من دون تحقير == ما كان عنتر من ترايب زبيبه
سكة تعب درب الرجال المشاهير == على بعض ناسٍ دروبه صعيبه
عباس بن فرناس يحاول يطير == واسحق نيوتن حاول انه يجيبه
وكل الدول حطت محطة وتشفير == وكلٍ ينادي للحبيب وحبيبه
من عصر ابن كلثوم وكليب والزير == والسيف والشلفا ودهمٍ عريبه
إلى زمان الفلسفة والاساطير == ومن الوجيه الراضية للكئيبه
ومن حر فوح النار جيتي زمهرير == يا رحلة التاريخ صرتي غريبه
يوم ان بطليموس جاب التصاوير == جراهام بل عبر الاثير يحكيبه
هات البشاير يا زمان التباشير == نوتة لحن على الوتر ينسريبه
صرنا نصدّق في كلام العصافير == وعن رحلة الاطباق لوهي قريبه
من عقب ماني ناجح برخصة السير == قال المثل ارض السوالف خصيبه
جيت ابسولف رحلتي والمعابير == عبرت دجلة مشملٍ بتغريبه
تهب في راسي هبوب ومعاصير == هي تلتجي بي فترةٍ والتجيبه
عود القصب ياما شكى من المناشير == ومن العطش تشكي الغصون الرطيبه
انا بحلمي غير وبواقعي غير == يوم المريض اصبح يداوي طبيبه
ويارحلة التاريخ نحتاج تفسير == يا رحلة التاريخ صرتي غريبه