ذهايب الذود..للملتاع

ذهايب الذود ..



لا تلمس الجرح .. يا معوّد .. و صبحى عَزوم ..
البرد فتّق ضلوعي .. وإنت دوّار صيت ..

ضيعت عمري أطاول في حزومي رجوم ..
وأيّست أبهديك .. كل الشعر .. في شطر بيت ..

لا الوقت وقتي .. ولا حلومي تطيع وتنوم ..
ولا الركايب وحادي العيس .. ترضيه ليت ..

ذهايب الذود راحت مع ذواهيب قوم ..
لا صار لك ألف قوماني .. فـ لك ألف بيت ..

رى أصعب الموت موتٍ .. يذبحك كل يوم ..
وأصعب حياتك تعيش .. وإنت جواك ميت ..

هذا الزمن .. ضيّع الشيمه .. وجبّ الوسوم ..
ما عاد ترضيه غير القاصره .. لا بليت ..

أواه يا طول عمري .. لا حسبت الهموم ..
ياكني أكبر من الدنيا .. ولا قد شكيت ..

علمك دهاني .. يالاقي خير .. خلّ العلوم ..
أسرجت .. صفراً من همومي .. عليها حديت ..

وأطلقت للبيد راحلتي .. وفوق النجوم ..
راسي وأنا كل راسي .. تيه فخر وهميت ..

وأقول للي يبي كرامتي .. لا تهوم ..
لأنتا .. ولا ألف مثلك .. يهدم اللي بنيت ..


كلمات / الشاعر الأمير طلال العبدالعزيز الرشيد .. ( الملتاع ) .. رحمه الله ..