ندا بن نهير ومطير

السلام عليكم ورحمة الله وبركاته

بسم الله الرحمن الرحيم

يالله انت محييهم وعلى الحق تهديهم وبالخير تجزيهم

ندا بن خلف بن نهير من الويبار من عبده من شمر ""راعي المليحا
فارس من فرسان شمر وشيخ من مشايخ شمر
لما راى الملك عبدالعزيز شجاعته عينه قائدا لبيارق الشمال ايام الاخوان
فتبعته شمر وعنزه والشرارات وغالبية اهل الشمال
فكان اغلب ماشتهر به هي "الباورديه" فكان بواردي قلما يخطي
اغلب مغازيه ضد مطير واغلب وقعاته مع مطير قتل منهم الكثير واخذ من حلالهم الكثير
فاصبح مطلوب لمطير
حتى الجمع اللي من شمر واللي يمر من عند مطير اذا كان معوه ندا مايضفي
عليه المنع حتى كثرة وقعاته مع مطير
***********
يقولون ايام وقعة ام رضمه اللي قتل به
تأخرت مطير ماوصلت قال بن مساعد
يامن يجيب لنا علم مطير وين صارو قال ضاري الطواله انا اجيب لك العلم
قال بن مساعد انهج وخذ معك واحد من الرجال قال ضاري ابي اندا
وهم يركبون مردوفه "يعني ركبو على ذلول وحده"
يوم نطو اكا الحزم ليا مار اكا الخيال من مطير مقفي قال ضاري مانقوى نلحقوه مار عندك ياندى كان تقوى تصيبوه
وهو يمد البارود ندى ويصوب وهو يتاخر مارمى بالاخير وهو يثور يالخيال على جنبوه
قالل ضاري ماحسبنك تبطي هالبطا ياندى
قال ندى والله مابطي هالبطا مار ياضاري كل مابي ارمي اليامار راسك قدامي واروغ عنك
***********
ويقولون مره غزا ندا ومعوه عدد قليل من فرسان شمر وهم ياخذون حلال علوى من مطير
يوم اقفى اليامار هذي خيول علوى لاحقتهم
قالو الفريس لاتردّون مطير واجد وحنا قليلين ماحنا حولهم
وهو يفرع ندا ويرد عليهم قال انا راعي المليحا قال حدا الشمامره عزالله قردت المليحا
وهويقبل عليهم وينصف خيلهم نصفين
يوم شافو شمر فعلوه وهم يردون على مطير
وتنكسر مطير
يقول واحد من شمر


ياما حلى ردة هل العرف يامنيف
راع المليحا وان نوى خيل علوى
اودع مناعير النشامـا مناكيـف
من يوم رده وانتخى طير شلوى


***********
ويقولون مره امحلت ديار قوموه وهو يجي اكا الواحد قال ياندا يوم انت
بهالمحول وشامت زرود مربعه وليه ماتنزل عليه
قال ندا من عليه قال الدغيرات وربوعن من سنجاره
وهو ينزل عليهم مرت الايام وهو يجي ندا على فرسوه يدوج
وهو يشوف اكا الرجال مربط وعندوه واحدن مادن البارود عليه
وهو يجي يمهم قال وش انتم قال الرجل راعي البارود انا من التريبان وهالمربط مطيري
قال ندا وش عندك عليه قال التريباني جوني حول هالعشر وخذو حلالي ولالحقت الا على هذا
ولا ادري ش اعمل بوه
قال ندا يمديهم ابعدو قال التريباني لا
قال ندا ود اسيرك يم البيوت وابي الحقهم ويامن هذا تعال
ان شفتهم يلحقوني وانت اسلم بعمرك ولاتقرب
ونا شفتن قاهرهم الا تعال وخذ حلالك
يقولون سوى التريباني مثل مابغى ندا
يوم خذا وهو يلحق ندا يوم نط الرجم اليامار ندا قاهرهم ومربطهم
وهو يجي الترباني وياخذ حلالوه
*********
الله يرحم ندا ولو اني رايي ان الخطا اللي وقع بوه ندا هو اشتراكوه
مع الاخوان فاكان اكثر من تضرر من هالحركه هم شمر

هذا اللي عندنا ونبي اللي عندكم

اقتباس: وهو يلحق ندا يوم نط الرجم اليامار ندا قاهرهم ومربطهم وهو يجي الترباني وياخذ حلالوه

<<<بعدي والله

ولد القصيد يسعدك ربي على القصة الحلوة

رحمة الله عليه راع المليحا
والف نعم بالفارس والشيخ ندابن نهير والله يرحمه ويسكنه فسيح جناته
ويطول عمرك
يابعدي ولد القصيد
لاهنت
على المشاركه ...
تقديري واحترامي

[motr]ولد القصيد
لاهنت
على المشاركه [/motr]

الفارس اخ المليح ندا بن نهير الله يرحمه ..
والله يسلمكـ يالغالي ..

الله يبيح منه والطيبين اهل الكرم والشجاعه ذكرئهم خالد


ولد القصيد


لاهنت يالغلا على المشاركه الطيبه



الله يعطيك العافيه يالطربه



لك الغلا

عشت عشت يالطيب
مشاركه
رائعه
يالولد القصيد
رحم الله فارسنا راع المليحا

مشكور يامالا العافيه
الصااااااااااااافيه

إيييييييييييه ياولد القصيد


نداء راعي المليحا تاريخ وافي

بكل مافيه من قسوة الزمان وجفاء النصوص
وظلم المؤرخين والقصاص

طبعا ً هذا شيخ عشيرتي الويبار وفارسها المغوار
أخذ شيخته من رأيه وسيفه وباروده المشهوره ام خمس
كان يطلق خمس طلقات بخمسة رجاجيل لاتخطي منهم أحد

الحقيقه التاريخ يظلم أحيانا ً في السرد

وربما بعض الحقائق تكون موجعه

وربما أيضا ًُ تكون جارحه ومصدر فتنه في الوقت الراهن

لكن كل ما أقوله رحم الله الفارس الجهبذ والذي صنع أشياء
لم تكن موجوده وبقيت معلما ً لتاريخ وحضارة شمر اليوم


سلمت على طرحك