الوصيه

[frame="13 98"]مشكوورهـ نبرهـ حزينهـ

انـآ اعجبني موضوعك

وحبيت اجيب قصيدهـ عن الوصيهـ ً


يا مل عيـنٍ فـي محاجيرهـا شـوك
والقلب به عـن لـذة النـوم تكـاك
..
لا دك في قلبـي مـن الهـم داكـوك
جاوبت طربات الحمايم علـى الـراك
..
عزي لحالك يا وليـدي وأنـا ابـوك
كان الزمـان اللـي وطانـي توطـاك
..
إفهم وصاتي يا وليـدي وأنـا ابـوك
دامك صغيـر وغايـة العلـم يقـراك
..
تراه مـا ينفعـك عمـك ولا أخـوك
لا صار ما تقضـي لزومـك بيمنـاك
..
وربعك إن بان الخلـل فيـك عافـوك
أقرب قريب ٍ لك من النـاس يشنـاك
..
إن كثر مالك صدقـواّ لـك وطاعـوك
وإن قل مـا بيديـك شانـت حلايـاك
..
لو تطلب الما عندهم كان ما أسقـوك
إبعد مـزارك عـن وطنهـم ومربـاك
..
وإن طاب حظك صدقوّا لـك وحبـوك
وإن بار كلن ما يبـي غيـر فرقـاك
..
وإلا إعترض لك من صروف النياصوك
كلـن تبـرا منـك ماهـوب ويــاك
..
هراجة المجلـس إلـى جيـت وروك
منـازل ٍ تطـرب نظيـرك بدنـيـاك
..
وإذا قضـى منـك اللـوازم وخلـوك
تفرقوا وأنت إحتمـل كـل مـا جـاك
..
كنك سـراج البيـت للنـور شبـوّك
وإلى إنقضى اللازم حدا الربع طفـاك
..
وألا كما ليمونـة الحمـض مصـوك
وإلا قضى منهـا الطعـم فرغـوا ذاك
..
واللي يجي من رفقته ريـب وشكـوك
إحذر عنـه ليـاك تصـدف بمسـراك
..
وإلا جفوك أهل الوطـن وإستخفـوك
قلّع غريسـك منـه وإهـدم ركايـاك
..
تراك لو تنجع عـن الربـع صعلـوك
أحسن من اللي تلتجي بـه وياطـاك
..
عطهـم وضيفهـم إلا منهـم جـوك
وإغلق ضميـرك لا تعلـم بقصيـاك
..
إن طبت ما حبوّك وإن عبـت زالـوك
تمضـي حياتـك ناقـل ٍ داك بـرداك
..
وإلى نفوك مـن الوظيفـه وعافـوك
خفـتّ موازينـك وكلـن تهـقـواك
..
وإصحى لخلان الرخـا لـو تغالـوك
إعرف ترى أطيبهم إلى إحتجت يجفاك
..
كنك خوي مقيـط دهـووك وأغـووك
وحقك عطاك رشاك وأقفـى وخـلاك
..
وإحذر عن العلة ترى الحـق مـدروك
مثل العمل يدركـك مـا منـه فكـاك
..
وإن كان عدوانك على الضيق حـدوك
فإخصـم طلابتهـم بعجفـاك وقـداك
..
وإن كانهم لمشـرّف الحـق ماشـوك
ناظر مطاليـع الفـرج قبـل مبـداك
..
وإن طاوعوا شيطان الأنفس وهانـوك
فإصبر على البلوى ودفنـك رزايـاك
..
زرهـم تـراك إليـا تونـيـت زاروك
إن ما بديت لصاحـب السـو يبـداك
..
ما دامهم ما طاوعـوا لـك وعرفـوك
إضرب على الكايد إلى عمست ريـاك
..
لو هذبوك إمن المصـاوب وضـدوك
مـا يذبحونـك قبـل تدنـي منايـاك
..
وإحلم على الجاهل ترى الحلم مبروك
وقم للضعيف اللي من الظيـم ينخـاك
..
وإدمح خطاجيران بيتـك إلـى أوذوك
ترى القصير وحرمة الجـار بحمـاك
..
عطهم لـوازم حقهـم لـو تناسـوك
في كل مـا يصلـح لدينـك ودنيـاك
..
وقم للضيوف اللي لفوا لك وضافـوك
أغلـى كرامتهـم حجاجـك وبشـراك
..
وإعرف ترا مالك للأضياف مشـروك
لولاه يطلب حاجته منـك مـا جـاك
..
وقم للرجال إن رايعـوا لـك وحبـوك
وإحشم خويك وأكرمـه عنـد ملفـاك
..
وإلى إعتبرت بسيرة النـاس كفـوك
ما كثر من شـي أتعبـك ثـم عنـاّك
..
ولولا تبـات بهـمّ دنيـاك مظنـوك
ما طاب لك ما دام لـك وإفتهـم ذاك
..
لو يطلبون إخفايك الناس ما أخفـوك
الرجل مثل النجم فـي كـل الأفـلاك
..
وصلاة ربـي عـدّ الأوراق والشـوك
أو ناض بـراق ٍ ومـا هـل سفـاك
..
على الذي ما فيه ريـب ٍ ولا شكـوك
محمـد ٍ مـا دك بالقـلـب دكــاك
[/frame]