في زحمة الدنيا تضيع المواضيع ....

]
[السلام عليكم ورحمة الله وبركاته

قبّل الله صيامكم وقيامكم

وكل عام وانتم بخير


اخواني واخواتي اعضاء ومشرفي وشعراء المنتدى الراقي بعد حيي

اقدم اعتذاري عن تاخري بل انقطاعي منذ بداية شهر رمضان عنكم

واهديكم هذه القصيدة عسى ان تنال اعجابكم وتسامحوني على التقصير والتأخير


والقصيدة بعنوان (( زحمة الدنيا ))




يا صاحبي حِـقّ النظر والتواقيع
في عين نـاقد عاش عمره زمانا
نـاقد يشوف الزايفات اللـواميع
في جيد بنتٍ زود زينه خذانا
لو رصّعوها بالجواهر تراصيع
تكشَف خفـاياها ووجهه يبانا
ويا غايتي لا تجهلين المراميع
للكون حدّ .. وبالحياة امتحانا
غاية مطاف الشخص يحضى بترفيع
ما دام حيّ يحصّل أعلا مكانا
نركض بهالدنيا حفاةٍ مفاريع
نِكرَم بها حينٍ وحينٍ نهانا
نشقا ويشقـينا الأمل والمطاميع
ما نلتفت للي تركنا ورانا
صرنا هجيجٍ بس نركض مفازيع
نخاف يمكن ما نحصّل عشانا
في زحمة الدنيا تضيع المواضيع
وشلون نصبر .. و الصبر ما قوانا
في زحمة الدنيا تشيب المراضيع
وحنا الشباب اليوم شابت لحانا
في زحمة الدنيا تغـيّر تواقيع
وإن ما خذانا السير يأخذ سوانا
السالفة .. فيها دخول ومطاليع
ومن لا احتسب عند المواجه يدانا
في هالدروب المظـلمه يمكن نضيع
عتمة سراديبٍ تضيّق فضانا
قرّب رحيل القوم .. واليوم توديع
والبنك من قرض السلف ما عطانا
وش قدّم المختار يوم أطروا البيع
يوم ابدوا الترحال شد ونسانا
كانوا يطيبون .. بقليل المنافيع
وكنا ولا زلنا طمعنا عَمـانا
وكانوا يبيعون .. برحيل المجاميع
وكنا ولا زلنا أملنا خذانا
عض الندم أو قيل عض الاصابيع
من قبل ما يصعب علاج إمرضانا