وحـــشــة الآغـــراب..؟؟

على نفس المكان اللي جمعنا جيت لـه مرتـاب

أسولف : هـو تناسانـي أو إنّـه ماتناسانـي ؟

نفضت غبار ذكرانا وطار مـن الحمـام أسـراب

وذكرت الدمعتيـن اللـي ذرفهـن يـوم لاقانـي

سنه .. فيهـا تعانقنـا وغنّـا للغـرام أحبـاب

سنه .. فيها تفارقنـا وعـاف الطـرس قيفانـي

منعت القلـب كـم مـرّه ولكـن الهـوى غـلّاب

يسوق خْطـاي لدروبـه إليـن الـدرب عنّانـي

تنصّفت الطريق اللي يـودي لـه شريعـة غـاب

ألا ليـت الطريـق اللـي خذانـي عنـه ودّانـي

وصلت !! ولا لقيت إلاّ المكان ووحشة الأغـراب

وبقايا عطـره وحزمـة مواجـع والأمـل فانـي

غيابه سيف أبو ليلى على صدري وشلفـا ذيـاب

وخفوقي فرسة الفرقـا وصـدّه سربـة أحزانـي

هنا .. بس إقتنعت إن المفارق يربـك الأعصـاب

مثـل ماتربـك حروفـه إذا ينطـق بـه لسانـي

هنا .. بس إقتنعت إن الفرح في حسبة الأجنـاب

هنا .. بس إقتنعت إن الهموم بحسبـة إخوانـي

طموحي مصافح يْديه وشرَهت بكلمتيـن عْتـاب

قبل ما حرّضه طيشـه علـى صـدّي ونسيانـي

كتبت !! وداخلي شوقِ يردّد يـا أولـى الألبـاب

بعد ما رد لـه بـوح القصيـد ولبّـت أوزانـي

ينادي فبحّـة أشـواق القصيـد وينـده الغيّـاب

وسمعت أصدائه بصدري أثاري الشـوق نادانـي

وصار عيون قرّائي وأحـس إن الشعـور كتـاب

على بيض الورق يرسم بقايـا طعـون حرمانـي

دعيت الله يغفر لـه إذا هـو عـن ذنوبـه تـاب

مدام إن قلبـي المجنـي وهـو القاتـل الجانـي

وقفت ... وطاحت دموعي وعطّرت الضمير وطاب

بـدال الدمعتيـن اللـي ذرفهـن يـوم لاقـانـي