ذكرت داري يوم كانت قرية =يوم البساطه وعيشة الحرية
عشت البراءه والشقاوه فيها=ومنها بنيت احلامي الشخصيه
من قاعها للجال لين الابرق =لي ذكرياتن ماهي بمنسيه
ايامها كنت ادرس المتوسط =عام ١١ بعد١٤٠٠
لاجيتها احيان وقت العطله =وبالذات وقت العطله الصيفيه
لامن قريت اهلا بكم في القرية =كني ملكت الكورة الارضيه
ماودي احدٍ يمها يسبقني =مادري حسد او انها حنيه
ولامن صفطنا جمسنا بالموقف=تحت المظله حزة العصريه
افتح بقوه بابها الوراني =وارمي شماغي وارمي الطاقيه
مابين عيني غير شوفت جدي=لابس عمامه ولابسٍ صدريه
تحت النخل واقف ويسقي زرعه=مركي عصاه وحوله الزوليه
الياسمع صوتي تبسم واقبل=ونادى بعالي الصوت يالله حيه
يامرحبا باللي لفونا الليله=اهلا هلا ويامسهلا بهالجيه
يازين ذاك الوقت ليته يرجع=ماظنتي ياتي زمانٍ زيه
مشتاق للحاره واهل الحاره =اهل الوجيه الطيبه والحيه
مشتاق للمجلس وربع المجلس=المجلس اللي شدني بمتيه
مشتاق للمسجد واهل المسجد =مشتاق للآذان ولراعيه
مشتاق للجيران واحد واحد =اكبارهم واصغارهم ماريه
مشتاق لليل الطويل الهادي =وسهراتنا لاطلعت الفجريه
مشتاق للصبح الجميل الصافي =وهاك النسيم وشوفت القمريه
مشتاق للوديان لامن سالت =وشعبانها وبيوتها الطينيه
الله اكبر لاذكرت المنظر =منظر جمال اسواقها الشعبيه
لامن قريت اهلا بكم في القرية =كني ملكت الكورة الارضيه
العضو الأكثر نشاطاً هذا اليوم 
العرض الشجري
