أنت معاك الحب له طعم ثاني

تعال اسولف لك من الراس للراس )
بعلمك وشهو شعور المحاني
لا شفت زولك شايفٍ در والماس
واليا نطقت اسمك تعطر الساني
تراك انته غير عن باقي الناس
انت معاك الحب له طعم ثاني
روح القصيد ومملكة حب واحساس
لذة حياتي دونك العمر فاني
لا مرني طيفك وانا ميتّ انعاس
لا غمضت عيني ولا النوم جاني
اشقر عفر فيك الحلا ماله قياس
ومع البياض مخالطك زعفراني
زينك على كل المزايين نبراس
حرقت كرت الفاتنات الغواني
فرقك ربي عن مجامييع واجناس
بلوى وربي في غلاك ابتلاني
تكبر بعيني كل ماجيت( عساس )
وتصغر بعيني كل ماقلت ( ماني )
واغليك لا من قلت (حاضر ولا باس)
واكرهك لا من قلت( كيفي اناني )
الوضع يبن الناس بالحيل حساس
خليتني بين الامل والاماني
لا غبت عني صرت يازين محتاس
وان جيت عندي صرت فلتة زماني


وفوق التعب والهم والبعد والياس
مقدر اخونك واعشق انسان ثاني
القلب يمنعني اخونك مع الناس
حتى ولو حبك مخربط كياني
اية غلا ماهوب مبني على ساس
نزوة غلا تمر مر الثواني
وكلمة احبك قلتها بكل كراس
مو ناقص الا اخطّها بالمحاني
تعال اسولف لك من الراس للراس
واسمعك احلى الحكي من لساني