ابي راي من يهدي لقلبي صليب الراي

[poem=font=",6,orange,bold,normal" bkcolor="black" bkimage="" border="double,4,indigo" type=2 line=0 align=center use=ex num="0,black""]
ابي راي من يهدي لقلبي صليب الراي=لعله يفيد الخافق العاشق اللي طاح
اخاف الملا تشمت وتضحك على شكواي=وراع الهوى بين العواذيل مايرتاح
مدام اكثر العالم تصدد تبي فرقاي=ولا همهم قلب وطاه الزمان وصاح
وليتي من اولها عطيت الهوى علباي= مدام الهوى يذبح طريحه بدون سلاح
او اني عقب طعنة خفوقي عرفت دواي=ولا جيت مع باب حصين بلامفتاح
ولا عشت بدروب المواليف رايح جاي=ادوج الخلا واطوي دروبه تقل مساح
ابي شوفة اللي صار حبه سبب بلواي=واعالج جروح الناظر الساحر الذباح
عنود مرابيها الغثيثه ورى مرباي =على الغرب من دار الضويحي وابن سراح
اذا طاف بي طايف خياله بدى مسراي=ولاتهتني عيني ليال الشتاء بمراح
على الحلم والهجس الهواوي وكوب الشاي=وكل الامل في شوف زوله بدون وشاح
هروج المها برموش عينه غدت سلواي=دلوع فروع والنهد يشبه التفاح
وعين نواظرها الجميله غدت منفاي=وريح اليا هب الشمالي وعطره فاح
اذا شفتها شفت السعاده ملت دنياي=وصار الهوى طير بغيم السماء لفاح
واشوفه بدت طبع عذابه يجيب اقصاي=تشابه طبوع القاتل الماكر السفاح
اذا بانت اوجاع المعاليق في نجواي=وبان الهوى بعروق قلب غدى منساح
اشوفه تلمح بالمخافه تبي ممشاي=لما اقول لا صادق بحبه ولا مزاح
يكرر معاذيره ويلعن بها مجناي =ويمشي ويرميني بموج القهر سباح
اذا جيت باليمنى تشوفه على يسراي=يعيده على قلبي ويمشي بدون ايضاح
واخاف القدر يرفض طوافي على مسعاي=واغادر من أسواق المحبه بدون ارباح
ولا لي سوى قاف بنيته على رجواي=يهيضه على قلبي سحاب شعاعه لاح
ابي واحد ينصح ويرفع لها دعواي=ويشرح جروح اللي تعذب وسده باح
يطول السهر وارقد بليلي على مركاي=واعاف المنام ونور فجر العرب ماباح
ونار السهر لاجل الحبايب تحت ماطاي=اذا كان خلي باقي بالهوى ماراح
[/poem]