معقول بلوانا سبب وعد بلفور

[poem=font=",6,orange,bold,italic" bkcolor="black" bkimage="" border="double,4," type=2 line=0 align=center use=ex num="0,black""]

معقول بلوانا سبب وعد بلفور=والا السبب كثر النفوس العميله
والا السبب ذل بالاذهان محفور=يودع عقيد القوم يدفق صميله
او عدلنا اللي تحت الانقاض مقبور=او ظلمنا اللي قام يقدح فتيله
والا السبب طفل صغير ومغرور=والناس تمشي تحت قوله وقيله
والا الكلام اللي بالاعلام منشور=يشبه حكايات الف ليله وليله
اللي يصوغه للمخاليق دكتور=ويلعب بميدان العقول الهبيله
له ريشة ترسم للاحداث ديكور=تجعل زعيم القوم بايع بليله
يمدح لك اللي بالخيانات مفطور=ويقدح بفرسان الخيول الاصيله
يودع عقيد القافله عقل عصفور=يروي لك الحاجه ويترك دليله
وانا سعودي بين حايل وابالقور=باللون واللهجه ونوع الفصيله
ولعب البلوت وكثر الازعاج بالدور=والهوش والتفحيط في كل عيله
واكلي من المطعم فطاير وشابور=واكثر لباسي بنطلون وفنيله
واسهر مع الشبه اليا فجة النور=واشذب بخلق الله عداله وميله
وكله تدل اني سعودي ومسطور=ومن وين ماهب الهواء يرتكي له
ومازلت اعيش بلا هويه وباسبور=مثل المقيم اللي هرب عن كفيله
اوراقنا راحت قبل شهر عاشور=في حوض نيسان قديم موديله
وان جيت اراجع قيل يالقرم ماجور=اصبر مدام الوسم ماسال سيله
وفي كل يوم لشرطة القسم مخفور=وهذا يثبتها وهذا يزيله
واشوف وضعي صار عادي ومخبور=وفرصة صلاح احوالنا مستحيله
وقتي يحاربني وانا اقول معذور=معذور باللي ماخذى طبع جيله
بس البلاء جيلي مثل نسل تيمور=ياطى الهوان ولا يهاب الفشيله
وانا من اللي حطموا جند خاكور=وعمري قضيته تحت خشم الرعيله
من ماكر كله شياهين وصقور=تقلط على صم الجبال وتشيله
ماقادها تاجر مواشي وهامور=ولا قدمت راع الكفوف الرزيله
يقودها اللي جاب ناصر ومنصور=من تاجر بالهند سدد جميله
تودع زوايا قصر الاجناب مدمور=وتنبيك عن فعله بيوت السبيله
والتمن اللي بأيسر الطعس منثور=امسى منام اهل العناد ومقيله
نهر الندى في ديرة الظلع مفجور=مثل السحاب اللي مزونه ثقيله
للضايق اللي خافقه تقل مجمور=تبري هواجيسه وتطفي غليله
وتسقي بساتين غدت غرس وحيور=وخضر الجرايد بالنخيل الظليله
نقوة نماها بالقنى تقل بلور=والا الجواهر فوق عنق الحليله
يبذل لضيف يدخل الدار مسرور=واليا بغى الترحال تملا زبيله
ولاطاح جار البيت ضايق ومكسور=ولا ضاق بدموع العيون وهميله
واعراض جارتنا نظيف ومستور=وماللردى والهون صوبه وسيله
طبع الجدود بعرق الاحفاد مبذور=ومصيون في عدل الليالي وميله
خلت مكارمنا مع الناس دستور=ماهي هروح اهل العزوم الهزيله
قالوا ترى دربك له اعوام مهجور=حروة ثمان عقود محدن يجي له
مايدهجه من طارش القوم مظهور=وسود الافاعي فيه تسمع صليله
من جاه طاح بلاهب القيظ مثبور=والا وقف بالدرب يومي شليله
اتبع هواك وذنب الاجواد مغفور=وفرصة غناتك ماتلاقي بديله
خل العهد من تحت الانقاض مطمور =مثل الذي يلوي الياجاع ذيله
ولازم تجور بمجلس الظلم والجور=وتصهل اليا شفت الخيول وصهيله
وتكذب مدام الكذب للنفس مقدور=وتمهل مدايينك وتسجن وكيله
والا تبي تاخذ بدنياك خابور=ومخباط بارود الحروب الطويله
وتصبح شماتات العرب تقل ماطور=وترحل عن القلبان صوب الثميله
وفعلا وقف ضدي بالانذال طابور=مع شلة بلواه ماهي قليله
ولو كنت انافق عند شاعر وشعرور =واسكت على الذله وهون القبيله
وحطيت للهدهد مخالب ومنقور=عند الهنوف اللي طويل جديله
وانسى فعول العوهلي وابن صمعور=اهل النفوس الوافيه والنبيله
ضمنت بمزون الهوامير قاطور =وصارت زروع العمر مثل الخميله
وتشوف لي كرش وعلابي وجرجور=وغديت بين الناس صاحب فضيله
ولا صرت مثل اللي رجى طيب كافور=لما وقع قدام جيشه وخيله
وماراح اعيش بسكة القوم مجدور=لاجل العميل اللي لبد عن عميله
مادام حجي للحرم صار مبرور=مالي ومال اهل النفوس الذليله
واصبر وشيطان الحواسيد مدحور=وحيل الله اقوى من جناديب حيله
[/poem]