انا من وين اببدا في عيونك وانتي عيونك
طريق مسافرين ورمشك اطول من مسافاته
طويل ولا يطيع وتسحبينه سحبة ردونك
كأن يخيـّرك ما بين روحاته وجياته
يطير الحرف ودّه يوصلك ، ويطيح من دونك
ترك للريح ريشه وانتهت كل احتمالاته !
عرفتي ليه هذا الشعر لاطعمك ولا لونك
ولا تشبه نهاياته عيونك ، لا بداياته ؟!
عجز يلقى ثمن يستاهلك ويسدد ديونك
كثر ماكان يفرح يعتذر عن كل زلاته !
اجل كيف يتمادى لا تذكر ضحكة سنونك
وهي تبني بلحظة ماتهالك من حضاراته
أحبك لاعقل واعقل ، ولا فتنه ومفتونك
ضياعه فيك ، كان يجمعه ، وأجمل خياراته
احبك والحروف الباردة ماتلمس ظنوك
تجي متكسرّه تقرا الفراغ تعيد سكتاته
ذبحتيني وانا اضحك لك على هونك على هونك
خذي ثارك وضمي المنهزم في كل علاته !
بفرعونه ، بسحره ، بالعصا ، مهزوم بجفونك
قبل حتى انتصارك ، سـلـمك نفسه وراياته !
يعيش بضحكتك ، في خفتك ، في هزة متونك
اذا شفتي طفل روحه وقلتي في دلع : هاته !
وعاش " بهاته " ايامه على تينك وزيتونك
جمع فيها حياته من جديد وكـل مافاته
عيونك : ليلة ٍ عن الف ليلة ، لين مجنونك
تجمع فيك لجل يجمعـّك بأطراف ضحكاته !
والاكثر من تجمع ، ماتفرق به من فنونك
وهي تجمع له الدنيا ، وتتضاءل عباراته
بتاريخ المعاني سحر اغانيه.. أجمل جنونك
بداياته هي أعظم ما لقاها في نهاياته
وهو في كل مره ينتصر : مهزوم بعيونك
كأنك تاخذين بثارها في أجمل ابياته !
الرائع / فهد دوحان .....
آمل أن تصل لذائقتكم .