تَنَآهِيد ,, تنهيدتي خفّي على باقي الروح ..!

[align=center][tabletext="width:70%;background-color:rgb(46, 139, 87);"][cell="filter:;"][align=center]

مدخل /

ياضلوعي ليه أحسك ترجفين ؟
نام فيك البرد وألا خايفه ؟

ياضلوعي ونـ شعل فيك الحنين
الظروف ومثل ما أنتِ شايفه

مامعي غير الكلام ودمعتين
أحضنيهم لو يدينك عايفه !!

تنهيدتي خفّي على باقي الروح
طيّرتي بـ آهك عصافير صدري

عبث وأيادي الحزن تبني بي جروح
والوجد يبعث بين الأضلاع قبري

والصمت يجرح مثل ما يجرح البوح
والـ آه تشعل نارها بـ جوف خدري

يسألني الإحساس من وين ماروح
متى شروق الشمس؟ وأردّ: مدري!

صدري وطن عوّد فصوله على النوح
قوته صبر يستسقي بغيم طهري

والآه غربة عمرها من عمر نوُح
تعزف على ناي التناهيد عمري

يزفر بها صدري مثل سر مفضوح
لا شالها صدري ولا الناس تدري !

تنهيدتي صوت الطفل منك مبحوح
لا تجرحينه ينتثر دم عذري

دام الفرح في مفرق الصدر مذبوح
والجاني يلثم فرحتي خلف ظهري

تنهيدتي هذا الحزن مابه مزوح
لا تخفضين الصوت ويطيح قدري

تأوهي دام السماء حضن مفتوح
وجنون شوقي خيل والدمع حبري !!

فتنة مشاعر نامت بـ حضن تهميش
لا تصحّي الفتنه / و ترحل بعدها

إما تغطي عاري الشوق و أعيش
و ألا اترك الفتنه تموت بـ مهدها

عصفورةٍ نتّف عنا وقتي / الريش
و ضلوع حلمي تشتكي من بردها

زرعت في أرض الأمل لـ العمر عيش
و الحظ مدّ ايده عليّ / و حصدها

كنت أسأل الأسوار هي شاهقه ليش ؟!
و أنا أعرف / الأسباب قبل أعتقدها

الصوت ضايع / و السياسات تطنيش
لـ حقوق بـ اسم الدين نصفي جحدها

لو قلت أحبك بينهم صاح بي جيش
المجتمع / لا حبتك / ينتقدها !!

هنا نموت / و ينعمون الدراويش
و العيب ملّة مجتمع ما سجدها

و هنا ثلاث أرباع فينا / معاطيش
محروم / حتى ضمة أمه فقدها

لا تقول ما ودّك / أنا ودّي أعيش
و أنسى معك ضيم الهموم و نكدها

و لا لا تقول اهدي عشاني و بـ شويش
حتى السما لاجلي تباكى / رعدها

أبي أحس إني معك طفلة الطيش
و انثى تلاقي وسط حضنك سعدها

و ابي أحس إنك معي فارس قريش
و طفلٍ فقد أمه و فيني وجدها .!

فتنة مشاعر عافت أحضان تهميش
لا تشعل الفتنة /و ترحل بعدها .!

مخرج /

طار من صدري تناهيد وكلام
وانكسر خاطر وطاحت دمعتين

وضاعت أنفاس الوله وسط الزحام
وصاح طفل الشوق من جمر الحنين

ياتناهيد الأمل اقري السلام
للطموح اللي توفّته السنين

وأمطري حظّه بعد دهر الصيام
لين تعشب فرحته فوق اليدين

واحضنيني خايفة أبغى أنام
لا تصحّيني على واقع حزين!

[/align][/cell][/tabletext][/align]