نسل الضياغم مثل عقد الجماني

[poem=font="simplified arabic,6,black,bold,italic" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black""]

يابو سعد نوم الخلايق جفاني=عامين ماحولي مبيت ومقيال
مدري على طول القطيعه نساني=او صار بين نزولنا عدة اميال
والا طريق اهل العواجه كواني=وخلا الهجوس بلجة الفكر تجتال
زادت على فكر وطاه الزماني=زال الشباب وهاجس الفكر مازال
يسرح بميدان الخلايق ثواني=ويرجع يعاني يافهد ضيقة البال
ماهو على اللي كنها مشعلاني=عين العنود اللي زهاه ابيض الشال
والا البنوز بصالة البهبهاني=اللي تخلي ناقص العقل يختال
عصر الحضاره في جيوشه غزاني=في سربة رمحه خطير وفعال
خلا الخسيس بواحة العمر هاني=وراع الندى يرجي كرامات الانذال
وصارت طبايعنا طبوع انطواني=ونسواننا تطلع ببدله وبنطال
وصارت حضارة جيلنا الارجواني=رمي العذارى في طواريق الاهمال
واليانويت الهرج عقلي نهاني=وقال الجمل ماينقل الشيل لامال
والطير لا شاف السبوق استكاني=لا طاح ساقه بالسلاسل والاغلال
قلت ان ميله قبل كون زغداني=ومن قبل يرفع كاس الابطال نادال
والحمد للي بالكرامه حباني=منجي سفينة نوح في غب الاهوال
رزقه عن ارزاق الخلايق كفاني=ولولاه كان الله عليم بالاحوال
ولو نرتجي بالرزق هادم وباني=ويحتاج توقيع ابو ماطر وشلال
تلقى النشامى لاجل رزقه تعاني=ذل العرب من كثر الاقفى والاقبال
قدام بيت القايد الصيرماني=وراع السماحه والمساحه والافضال
وتطلب عليك صكوك مثل الضماني=تثبت له انك جايع غير محتال
وتقوى لهظم العيش والبيدجاني=مع حسم للي يشتكي ضيقة الحال
والغيث مره في ليال رمضاني=وفاتورته تاصل قبل نصف شوال
ومن صاح يلقى السجن والخيزراني=لو قال انا عندي عواجيز واطفال
وتلقى الذي ياكل صحون وصياني=وغيره يموت من المجاعه والامحال
وهي حالة صرت عياناً بياني=في تالي الثاني عشر تقل تفصال
بالسبع والتسعين هاك الزماني=يوم النعايم والغنايم والانفال
اللي بعرس الزاهد المربحاني=تصرف دنانير الذهب دون مكيال
وخمسين من جزل النياق السماني=في حفلة منها المخاليق تهتال
والجوع يقتل كل قاصي وداني=والطفل مايلقى عن البرد طربال
علم رواه الزاير السعلواني=اللي لبس في ليلة الحفل سلسال
لو مارواه الفاضل المهلقاني=واللي تغرك بالمظاهر والازوال
وقلب البشر عجل حريص اناني=ويجمع على اللي يشبعه عدة ادبال
ولا شاف رزق الغير جاه الجناني=وشلون لو يملك مقادير الاجال
وهو يعلم ان العمر ملفاه فاني=والشيب لاح بعارضه يشعل اشعال
وشفنا الذي يملك شطوط ومواني=ومن الذهب يقوى على عدة ارتال
اقفت ظعونه عن عدود الدجاني=وامسى تحت رمل الفيافي والاوحال
وشر الاقارب مثل طعن السناني=والحسد يسطي بالحشى تقل سلال
لو رحت للدكتور والصيدلاني=او سقت للحاسد عيونك بفنجال
ماراح تلقى فيه طيب وحناني=ولا تنتظر مزنة هل الحسد تنجال
ان شاف طيبك صار فيه احتقاني=ولا يذكره قدام عم ولا خال
وان شاف زلاتك غدى له غواني=ويركض بها وسط الملا تقل دلال
والناس لو ترفض دروب الهواني=مايشتكي من جمرة الهون رجال
بس الطمع خلا الخسيس الهداني=يرتاح بدروب المهونه والاذلال
لما غدى طبع العرب شقلباني=يمشي على السيكم ويمشي على بال
وراقب مصايب مصر والقيرواني=وكيف الدسايس بالمساكين تنهال
من عالم تعزف لحون الكماني=لو مالها في نوتة القوم موال
تخشى ركود الساحل المسلماني=وتسري لهم جرثومة مالها امصال
ويدفع لها المريخ والكوكباني=ومحدن يحلل للعرب كثر الاعطال
ودونت قاف الهاشمي والكناني=ورب الملا لعقود الايام حلال
تجري بحور القاف عشر وثماني=مع وادي يجرف طريقه الياسال‎ ‎‏
سهل القوافي والهدف والمعاني=صعب على اللي يجلب الروح بريال
من عيلم وسط الظلوع المحاني=ماتضبطه حسب المساحه والاطوال
يشبه شروح الفتح للعسقلاني=اللي سرد كل المذاهب والاقوال
ويعطيك للقالات رسم بياني=حتى ولو طالت خراطيم الافيال
للي كلامك بالفراغه دهاني=مدري علامك قمت تطمس وتحتال
غرك كلام الكاتب الهيلماني=اللي ورد بيره بلا دلو وحبال
وجتنا خيول الهرج ماله عناني=وليتك شكمته بالشبيلي والاقفال
وتاخذ على الطولات شيك ائتماني=وتجعل لنا عن خزنة الشعر معدال ‏‎
ودامك رفعت الصوت يادان داني=وخليت اهل حايل لفايق وبنقال
وحطيت فعل الترك للتركماني=وخليت روس القوم تتبع للاذيال
سقت القوافي كان ربي هداني=مثل العقود بصدر سوسن وفريال
فيها وسوم اذوادنا الذيهباني=اللي غدت مابين جاهل ودجال
والكذب ماله بالضماير مكاني=والصدق ماله بالمخاليق منزال
ولو طعت هرج اللي بماله بغاني‎ =بالكذب شلت من الذهب عدة احمال
وغديت نجم القوم بالمهرجاني=ورفعت روحي فوق وسامة الدال
لاشك عفت الثور والهذرماني=لاصار مالي في هوى القوم مدخال
لو طحت بين الطرق والسندياني=هذا ثقيل وذاك عيب وغربال
وشديت عقدات المرس بالسواني=فوق القليب اللي نقل كل الامال
بين الغروس اللي عذوقه ثماني=والطلع بين فروعها يذهل اذهال
ميره يقلط في ليال الصخاني=للجار وضيوف لفت طيب الفال
بأرض الجبل والظلع والديعجاني=حايل مقام اهل الوعايد والافعال
من دور حاتم طي والهرمزاني=اللي غدى رمز الكرم بين الاجيال
لعهود ابوتمام والقسطلاني=لليوم وامجاده تردد بالامثال
مكارمه صارت عطور المكاني=وداجت دياوين العرب دون مرسال
دار الندى والهيل والزعفراني=زمل التخوت اللي يشيلون الاثقال
ديرة هلا للي لفى الدار عاني=لو كان مايملك من المال مثقال
يلقى كريم شامخ مرحباني=للطيب حواش وللزاد بذال
اللي ذبح لذيابة الظلع ضاني=ذيب زمانه في وقوت الدهر عال
ماراغ عن ضيف العرب تقل جاني=مثل الظليم اللي تقفاه شعال
وخوينا اللي طاح والساق واني=شلناه في قاع حداه اشهب اللال
واللي سقى المعزى حليب المقاني=معزى قصيره في ثلاثين مرحال
واربع نفوس ساسها مودماني=ومن القهر سارت على القبر بالحال
وبالحرب لا ساج الحقب بالبطاني=وسارت ظعونه بين سجه وزرفال
يتلون شيخ ضاري للطعاني=له هدة وسط العدى تقل زلزال
نسل الضياغم مثل عقد الجماني=تنحاش عن وجهه صماصيم الابطال
ياطى العوالي عن دروب الطماني=ويدري بعلمه كل حافي ونعال
وتمشي له العربان تبي الاماني=عن ضيعته مابين حل وترحال
ضرب المدافع بالحجر والمباني=يودع قلوب اهل الفراغات تنشال
وساقت زكاته لاجل عقد القراني=عن سربة فيها الصوارم والاشبال
داجه من الشنبل لدار اليماني=وطوع صناديد الجزيره بالاجمال
كلن يشوف الجمع شوف العياني=يطوي مع المسرى صحاصيح وجبال
ان قلت ابن ضيغم وطى العيلماني=والعيط اخو جوزاء وطاها ولاسال
وان قام ابوخوذه سنى المجد باني=وان قاده التمياط يازن ويكتال
والخصم يلبس ضدنا الصولجاني=ويجمع مخاليق العرب مثل الاجوال
لاجل الفزايع من طوال الرداني=ضد الحيود اللي مثل صم الاجبال
تسري من البصره لساحل عماني=تسري بها نار الضغاين والامال
مثل الصريف وهجمة المصلحاني=وجيش الصباح اللي لفى الدار صوال
جاب الخلايق من حدود اصفهاني=وعشر القبايل جابها حبل الاجال
واغراه ابن ناصر بسجع الغواني=يمدح سلاح بالعرب ماله امثال
وخلا مبارك فارس النهرواني=وصم الجبال الياسرى الشيخ تنشال
وجاها الصروم الساطي الضيغماني=خيالنا اللي قيل يسوى الف خيال
وخلا سلاح جموعهم طرطعاني=وصارت على الطماع غيظ وغربال
رمي البنادق يشبه الديدحاني=باللي هقاها هوش حاره وجنجال
وامسى يحث النوق بالهوذلاني=وخلا الجموع بساعة ماله ابدال
تشبه حبوب الطنج والكيرماني=او كورة بأقدام عدنان درجال
وين الذي يرسي قوي الجناني=وعشر القبايل مابها واحدن ذال
ودسنا جيوش الفرس والجيشخاني=اللي تواريخه قديمات وجلال
حاسه صفوق القايد المصعباني=اللي رماها بين حزم ودركال
وتاريخنا مافيه حاني وماني=وصعب نعيل ولا نسلم لمن عال
تشهد بها وايل وراع الحصاني=سادات نجد اللي رفاه ابن هذال
وتشهد بها العتبان سمن العداني=اللي خذت من طاقة الطيب سربال
قوم يشار لطيبهم بالبناني=وبيوتهم للي شكى الضيم مدهال
ولو تنشد العوني عطاك البياني=ومحمد القاضي يمدك بالايصال
وفجحان وابن غيام واهل المثاني=والعرفجي ساقه بلا قيد وعقال
وراعي نفي يشهد وراع أبرقاني=وابن السنيدي قال قوله ولامال
وراكان والعزي عريب اللساني=واقوالهم تقوى على فض الاشكال
راحت تسير بسهلة جرهداني=بين الرجال اهل المشالح والادقال
مايطمسه بين العرب جلغماني=ولا ياخذه بالناس سارق ونشال
وصعب تغطي شعلة الفرقداني=وتدفن تواريخه بشيول ونكال
ومحدن يصادم بالملا راس اباني=لو قال انا نجم هدم نابي الجال
واللي يسولف بالفراغه يداني=لا صار مايدعم كلامه بالافعال‎
وان سلت عنا من جموع قحطاني=وذكر اللفايق والعواصم بالامثال
هذي لابن حلاف طلق اليماني=شيخ الضفير بوقت قالات وجدال
ماهي لاخو رثعه بليا رهاني=وماهي لشمر بالصلايب والانجال
والحوس يودع صاحبه بوبهاني=وتصبح سواليفه رديات وهزال
واللي جمع هتلر وكوفي عناني=محدن يسير بظل قوله الياقال
واليوم صارت سهلة سمهداني=وساد الامان بكل مخرج ومدخال
وصارت علابينا عراض متاني=وكلن معه راتب وموتر وعمال
امسى لشعار الخلايق نواني=وجتنا القصايد له مغني وطبال
تذكر علوم القايد القهرماني=اللي قهر عكا ودكا ونيبال
لما غدى بين العرب سوبرماني=وشاد المراجل بين حجل وخلخال
وخلا المكارم مع طوال الاذاني=وسجل علوم بالرخى تذهل اذهال
واللي بوقت الطيب ماله بياني=امست علومه بالدياوين تنقال
والناس فيها الشري والقحوياني=وربي جعل فيها النشاما والانذال
وصعب تعم الناس في كل شاني=والكثر غالب بالمرابع والامحال
مايرفعك راع الندى المكرماني=دامه بوسط الفين عفن وزبال
والخلق في دنياه مثل الاواني=وربي فرق خلقه بشوفات وخصال
احدن اليا قلت فلوسي رماني=وقام يتعذر بالعزايم والاشغال
واحدن اليا زانت حياته دعاني=وطبعه حجز في روضة الطيب منزال
واحدن اليا ضاقت دروبي شكاني=وامسى بميدان الجشع يهذل اهذال
واحدن اليا ذقت المغثه رفاني=ويقدر يشيل الحمل الاول مع التال
واحدن يضيع بسهلة صحصحاني=واحدن يعديك الفيافي والاسهال
واحدن بوقت الطيب مثل الشباني=واحدن يشوف الطيب تبذير وهبال
واللي لكم بالمرجله يالفلاني=معروف مايحتاج شايل وحمال
ومافيه علم كان تحت الدفاني=خص العلوم النادره بين الاجيال
والكذب وهروج الرخى واللعاني=عيبه على اللي قالها يابن صلال
ومن يقنص العقبان بالكيرواني=يضحك بعقله كل راحل ونزال
ونيل المكارم مايجي بالتماني=لا صرت ماتقوى على ثقل الاحمال
والصدق يظهر والله المستعاني=لا فات له بالقوم روحه ومرحال
جتنا علوم الذيب والغيهباني=من وسط يام بلا براقي وجوال
والمجد ماهو في خذيته خذاني=والحرب والغاره وقاتل وقتال
الضيف والجيره وبذل الحساني=ودرب العفاف بكل سيره ومنوال
ونفع القريب اللي لفى الدار عاني=وفك الدخيل اللي هقى فيك مدخال
ورفيقك اللي رافقك مايهاني=ورفع النفوس عن السقايط والاوحال
وش عاد لو تكسر جموع شهواني=وبيوت جارك مظلمه مثل الاطلال
وترى الشدايد للرجال امتحاني=تكشف عزوم بالقسى تقل صلصال
ومن هاب صرف المال والدرهماني=داس المراجل والمواجيب بنعال
وحايل وراع الجوخ والطيلساني=مالك بها يالقرم ناطي وفتال
وبينك وبينه بالندى صيهداني=هيفية مابه مواريد وظلال
حنا هل الطولات واهل المعاني=وحنا ربيع اللي شكى ضيقة البال
حنا لهيب الملح والجبخاني=وكيف ومفاطيح ودياوين ودلال
وحنا خذيناها من اول وثاني=مثل السحاب اللي على القاع همال
حنا القراح الصافي الريهجاني=وحنا الشموس وغيرنا نجم وهلال
وحنا هلاك الصفر والشيعلاني=واهل البيوت النايفه قبل رويال
وحنا الوفى كان اكثر الناس خاني=ونرسي بقالات طويلات وثقال
وحنا حكمنا نجد لين اسفواني=وصرنا لراع العلم والعدل منهال ‏‎
وبرزان قصر الحكم والبرلماني=بالمجد نال من الطويلات مانال
تنصاه شيخان العرب بالتهاني=واللي شكى جور المخاليق لاطال
فينا وزارات وسفير ولجاني=وفينا النقيب وصف ثاني ومارشال
وان قلت كل اللي تقوله خفاني=ولا داج ذكره في محطات الارسال
ولا جاك فعل الحثربي والدماني=وفزوع ضاري بالنشامى اليا شال
فالكتب هرج الكاتب المشنواني=وبالفعل حاستها الخرانق والاوعال
وصارت عجين بنكهة البردقاني=وتشفق على شرح الاماكن ورحال
والكذب تنفاه العقول الذهاني=اللي تجيب لطعنة الكذب جيزال
واكثر بدايع فعلك اللي لفاني=مايصعدك يامسندي مصعد عال
وشي تشوف العين سر وعلاني=تعطيك عن حال الاجاويد تمثال
واللي بنى بيته هشيش لياني=مايقرط اللي يرجم البيت بالحال
واترك كثير الهرج يالبهلواني=ان كنت ترجي خالقك مال وعيال
والناس تفهم ماتبي ترجماني=مادام بالربع القريبين عقال
وان ماشفاك الموجز اللي شفاني=الناس تدري بالجدايد والاسمال
[/poem]