واقاتلي..

واقاتلي..




واقاتلي ما درى عني ولا ويني
يا قاتلي ليت صبري ربع من صبرك

على كثر منت جافيني وناسيني
على كثر ما اشوفك غير واعتبرك

ولا تغيرت وسنيني هي سنيني
شاعرْك.. عاشقّك .. مجنونك على خبرك

ما اعرف شسمي ولا ادري عن عناويني
باخع من الحزن خفّاقي على اثرك

ما فيه دربٍ يودّي ما يودّيني
مدامك الارض قلّي ليه ابختصرك

احبك بكل ما املك من شراييني
ليتك محطه يعبر العمر واعبرك

انت اشتركت بتفاصيلي وتكويني
كنّي انا انت من صغرك الا كبرك

تغيب واصير صب ويعترك فيني
اشباح نسيانك وملايكة ذكرك

وتطيح من عيني الدنيا على ايديني
واقول اخسر الجميع وانت ما خسرك

حذني على قد حبّي لك وتخميني
ولا تعذّر لاني دايم اعذرك

وتعال شف وجهي المنهك وشف عيني
وخذني بـ ياديك من سحرك الى نحرك

من كثر ما قلت بتجيني ولا تجيني
وانا معك .. نصف معك .. ونصف ينتظرك

علمتني ما اضيّع شي فـ يديني
انا فدا امك وابوك وعفوك وشكرك

العمر ماهو بـ سنينك وبسنيني
لحظاتك اللي فيها تحب هي عمرك




أكتب لك..


ما ادري وش اكتب لك علشان تقرأ
ما دامني ما عدت قادر أكلمك

أهم شيء ان انت بشعوري أدرى
سواء اعلمك و الا ما اعلمك

ما دامك الجلاد و افراحي اسرى
ما فيه داعي اشتكي و اتظلمك

الجرح دامه منك جعله ما يبرى
يشفيني الله و انت ربي يسلمك




أتعبني الانتظار وااااخ من بابك
لاهو بمفتوح .. ولا هو بمتسكّر

الى متى وانت راكنّي على أعصابك
والى متى وانت بتفكّر وبتفكّر

يا اغمض الناس في سهلك وترحابك
ويا اوضح الناس حتّى وانت متنكّر

خذني من اصفر جفافي ل أخضر اعشابك
تراه ما احلا من الوسمي ليا بكّر