طبعا وبعد مشقة السنين أدقنت حركة الدرفت بااااااركووولي
تعريفه : إنك تخلي السيارة تمشي بالعرض
(وفي رواية أخرى إنك تفقد السيطرة على السيارة لكن بطريقة فنية..) خصوصاً على المنعطفات واللفات..
ليش نسوي دريفت : أولا علشان نكسب وقت في المنعطفات
وثانياً للعرض أو الشو في الحلبات
آلية الدريفت: عن طريق جعل التواير تتدور بسرعة أكبر على اللفات مما يؤدي إلى إنزلاقها ..
المقادير : سيارة (أكيد لازم سيارة) قير عادي سواء كانت وكالة stok ولا مزودة ..
وياحبذا لوتكون دفع خلفي لأنه الأنسب وأنا ما أقول إن الدفع الأمامي ماينفع بس مب شرات الدفع الخلفي والفور ويل ماعتقد تناسب أبداً ..
طرق عمل الدريفت ..بقسمهم لقسمين
الأول بالسيارات العادية الخالية من إضافات (توربو أو سوبر ولا غاز) يعني سيارات الوكالة..
والقسم الثاني الي هي السيارات المزودة ..
السيارات العادية..
بإستخدام الكلتج..
1- طريقة الغيار العكسي مع البترول..
عند المنعطف
1- دوس على الكلتج كله ورد القير غيار عكسي
2- وثم نفس الوقت عط ريس لين يرتفع الأر بي أم
3- شل ريلك اليسار من الكلتج
النتيجة : طبعاً راح ينتج قوة هائلة مفاجأة للتواير مما ستسبب إنزلاقها .. (وهو المطلوب)
2- طريقة الغيار العكسي من غير بترول..
عند المنعطف
1- دوس على الكلتج ورده غيار عكسي وخل الأر بي أم بنزل لمستوى أقل بوايد من السابق (يعتمد على سرعتك)
2- شل ريلك من الكلتج مرة وحدة
النتيجة : التغيير الجذري في الأر بي أم راح يخلي التاير الي ورى يقفط مرة وحدة مما يعني دريفتنيج..(وهو المطلوب)
بإستخدام البريك..
داخل المنعطف..
إسحب الهاند بريك بينزلق التاير ..
واجهة السيارة بتكون في جهة اللفة وخلفية السيارة بتكون في الجهة العكسية ..
أو
داخل المنعطف
إمسك بريك وخلي وزن السيارة يتجه للتواير الأمامية وبعدين بإستخدام كلاً من البريك والغيار (ليس في نفس الوقت لكن حسب إنت وكنترولك) حاول تخلي التواير تستمر في الإنزلاق ولا تخليها تستعيد وضعها الطبيعي..
يعني لوشف السيارة إنزلقة وايد إمسك بريك ولوشفتها بدة تمشي عادي زيد الريس .. وإنت وشطارتك ..
هذا كان بالنسبة للدرفتنج على الفات القصيرة أو الدوارات نقدر نقول
أما بالنسبة للدريفتنج على إنحناء الطريق في الدريفتنج الطويل
فسيتطلب طريق طويل أولاً وثانياً سرعة عالية (فوق ال 150 كم\ساعة)
أسحب الهاند بريك مرة وحدة جنك تبي تخشعه وساير مع اللفة ..
ماعتقد يبيلها شرح وايد لأن الفكرة أعتقدر صارة واضحة الحين..
طبعاً يبيله تواير دريفت مابقول إشتري تواير غالية بس حق الدريفت ويتقطعن بسرعة وتخسر فلوسك ..
بس فيه تواير ماتمسك على الجار عدل تنفع للدريفت ..
السيارات المزودة..
1- يوم بتمون في اللفة زيد السرعة طبعا يوم بيقتح التوربو ولا السوبر بيعطيك الجواب الصح ساعتها التاير بيحارة وبينزلق بروحه..
2- قبيل اللفة بشوي لف السكان عكس جهة اللفة ولماتحس بأن وزن السيارة صار على التواير الخارجية (الي عكس إتجاه لفة السكان يعني جهة اللفة الي تبي تسوي عليها دريفت) إكسر السكان مرة وحدة جهة اللفة..
بتحصل إن الجامبينات لما تلف اللفة الثانية تنقل الوزن بسرعة من صوب لصوب وهذا بيخلي الموتر يدرفت (ينزلق) .. طبعا يبيلك جامبينات من ماركة معروفة ويكون الموتر منزل
3-في اللفة شل ريلك من على الريس مرة وحدة بتلاقي إن وزن السيارة كله سار لجدام (على التواير الأمامية) بس طبيعي بتلاقي السيارة سوت دريفت
في الأخير معلومات مهمة يمكن تفيدك :
1- طبعا بالأول لوعندك مانع إنزلاق في السيارة بنده (ولا إكسره.. ههه هق هق هق)
2- تواير تنزلق بسهولة وياحبذا لوكانت تطلع دخان
3- تذكر اللفة الأولى سريعة لكن الثاني (العكسية) تكون بشويش (لاتصدق الأفلام)
4- طبعا في اللفه بتكون قاعد توازن الدريفت بالسكان يمين ويسار على حسب الدريفت
5- ترص على الجامبينات عن طريق البار الي يكون على المكينة (موجود في الزد جدام وورى .. )
6- تزيد من قوة المكينة (توربو أو....)
7- تركب نظام تبيريد للسيارة لاتنسى إن السيارة معظم الوقت بتمشي عرض يعني نسبة الهوى الي بيدج علشان المفروض إنه يبرد الإنتركولار ولا الراديتر عموما ضئيلة..
8- تركب ليمت سليب دفريشن بيخليك تتحكم بالسيارة أكثر وخصوصاً على أكثر من لفة دريفت..
9- إنفخ التواير فوق الأربعين وتحت الخمسين علشان تساعدك في الإنزلاق
10- طبعا التواير الجدام ممكن تكون أحس من الي ورى لأن الي ورى إنت بتحرقهم بالدريفت ولالوفلوسك زايدة إشتر تواير دريفت الي هم أغلا تواير في عالم التواير..
11- كلما كانت السيارة خفيفة الوزن كلما عطتك شغل عدل..
12- طبعا تقسيمة وزن السيارة على التواير الجدام والي ورى كلما كانت متساوية كلما كان الدريفت وااااو (بالمناسبة ال 350Z نسبة الوزن فيها 53% قدام و47 % ورى لذلك لما تمشي السيارة تتحول هاي النسبة ل50 % جدام و50% ورى وهي النسبة المثالية للدريفت ..أحم أحم ) والمعروف إن السيارات اليابانية هية الي تتصدر الدريفت لأنا الأخف
مثل (جي تي إس + أر إكس 7 + السيلفيا + الزد 350 .... )
العضو الأكثر نشاطاً هذا اليوم 
العرض الشجري
