اجمل قصائد عنزة مع الصور في حفل السيف

في حفل أجتمعت فيه شيوخ وشعراء وأعيان قبيلة عنزه
في محافظة بقعاء عند اسرة السيف في بقعاء

كان ذلك في يوم الخميس ليلة الجمعة الموافق 28 / 2 / 1429 هـ
وتم لمنتديات بقعاء تغطية الحفل
وأليكم تقريراُ عن ذلك

بسم الله الرحمن الرحيم
الحمد لله ما عم فينا فرح وسرور وما طلع صبح وأسفر ، وصلاة وسلاماًَ طيبين مباركين
على النبي المطهر
نحمد الله تعالى على نعمت الأمن والأمان حيث رزقنا الله بحكومة تحكم بكتابه وسنة نبيه
فانتشر العدل و أنعدم الظلم والظلال
فاللهم إجزهم خير الجزاء وأدم على البلاد الأمن و الرخاء
أما بعـــــــــــــــــد:
أيها الضيوف الكرام أيها الجمع المبارك إن السيف في محافظة بقعاء
يرحبون بجميع ضيوفهم الكرام من أبناء عمومتهم من قبيلة عنزه و يقولون لهم :

:

ياسـلام الله على من جالنـا عاني=مرحبـاً ياهـلا و الفين ترحيبـه
كاسبين الطيـب و للطيب عنواني =وفـدهـم لآ حضر كلاً يهليبه
نفرح ونفخر بلابتنا ذربين الأيماني=لاجلكم غالي المذخور نصخي به

فمرحباًَ أيها الضيوف الكرام ضيفاًَ ضيفاًَ ،
وأهلاًَ وسهلاًَ بكم ألفاًَ ألفاًَ ، وحيَّ هلا بكم مرحباًَ
فالسلام عليكم ورحمة الله وبركاته
خير بداية لهذا اللقاء آيات بينات يتلوها عليكم
تركي أحمد السيف

ثم بعد ذلك القى الشبل
متعب سعود السيف
القصيدة التالية :

يا مرحيا ترحيبة عنوز بعنوز=حق واجب مابها أية جمايل
ياخير من يلفي علينا رموز=و الصامل من القول قبل الفعايل
هلا و غلا يامرحبا ماله حروز=ببقعاء شماليْ شرقي دْيار حايل
استبشرة بقدومكم وانتثر روز=و ضحك حجاج الوجه بعيال و ايل
أقولها من قلب صادق وبه فوز=وهاذي أبرك الساعات و العمر زايل

ثم تكلم الإستاذ فهد عبدالله السيف عن نبذه عن بقعاء و عن أهلها الكرماء وهي كالتالي
أيها الضيوف الكرام
تقع محافظة بقعاء
في الجهة الشمالية الشرقية لمنطقة حائل على بعد 90 كيلو متر تقريبا
وهي تابعة لمنطقة حائل إداريا وهي من أكبر محافظات المنطقه وهي فئة(أ)
وتعتبر من البلدان القديمة ومن أقدم المدن بمنطقة حائل وهي مركز تجاري واداري
للعديد من المدن القرى والهجر التابعة لها .
وقد نمت وتطورت شيئا فشيئا في عهد النماء والتطور في
عهد حكومتنا الرشيدة بقيادة
خادم الحرمين الشريفين الملك عبدالله بن عبدالعزيز حفظه الله
و ولي عهده الأمين صاحب السمو الملكي الأمير سلطان بن عبدالعزيز حفظه الله
و بمتابعة واهتمام من
صاحب السمو الملكي الأمير سعود بن عبدالمحسن بن عبدالعزيز أمير المنطفة
و صاحب السمو الملكي الأمير عبدالعزيز بن سعد بن عبدالعزيز نائب أمير المنطقة

اخذت الرقعة العمرانية والسكانية في بقعاء في ازدياد ونمو متواصل 0
وقد شمل التطور بها كافة المجالات الاجتماعية والتعليمية والصحية
والزراعية والبلدية وغيرها .
تقع بقعاء على تكوين صخري تحتضنها رمال النفود من الجهة الشمالية
ويحدها من الجنوب الشرقي منخفض تتجمع به السيول و من الجنوب
تظاريس جبليه ومن الغرب سهول رملية
استوطنها أهلها واستمروا فيها بسب وجود الماء بوفرة
وبمسافات قريبة حيث تكثر فيها مزارع النخيل
و يبلغ عدد سكان مدينة بقعاء حوالي ( 20000 ) نسمة و بإضافة
المدن القرى والهجر التابعة لمحافظة بقعاء بيلغ مجمل عدد السكان 50ألف نسمة .

الأحياء الداخلية في بقعاء :ـ

تم تقسيم مدينة بقعاء

.حي اللويمي
.حي العبيد
.حي سمري
.حي السيف ( الوسطى)
.قصر النهار
.حي العقله
.قصر العودة
.حي الدخيل
.مخطط الظهيرة
.حي االصهيبي
.مخطط الحفل
.حي حمام
.مخطط بقعاء الشرقية
.مخطط الكهرباء
.بقعاء الشرقية
.مخطط صلاح الدين

أيها الضيوف الكرام إن موقع بقعاء قديماً جعلها
هدفاً للضيوف فمن أراد دخول النفود مر بها وتزود بالماء و الزاد
و من خرج من النفود فليس أمامه الا هي وقد أشتهر أهلها بالكرم و منهم :

سعد بن حتيرش و المتوفى سنة 1080هـ رحمه الله
و قيل فيه الكثير من الشعر و مما قال فيه شايع الأمسح :

إن كــان بــالجيــران جــار مــدلل=فجـار أبن حتــيرش رابي بــدلال

و منهم : خميس بن محمد الأسعدي الملقب (( الخضاع )) رحمه الله
و هو أخو بريك راعي بقعاء و لقب بالخضاع لكثرة ما ينحر من الأبل يخضع رقابها

ومنهم : بريك بن محمد الأسعدي (( راعي بقعاء بيطار الأشعار ))
المتوفى سنة 1180هـ رحمه الله
و قيل فيه الكثير من الشعر ومما قال فيه فيصل بن سويط:

لا جــيت أخـو عفـرا بـريـك فقـل لـه=يا ريف هتــاش الخـلا بالـعـوايد

و مما قال بريك (( بيطار الأشعار)) في قصيدة له :

نقــول لهــم قبـل التنـاشيـد سمــوا=قـراهم نمـاها و الضوى من صريفه

و منهم : عبيد بن حمود بن عبيد بن نهيت المتوفى سنة 1339هـ
و قيل فيه الكثير من الشعر و مما قال فيه شفق الجهيلي :

هـــيه يــا ناس ياللــي وافـــدين=تـروا الطـــيب مـا عبيــد وراه

و منهم : فهد بن حمد العبيد الملقب (( الضحيك)) رحمه الله
و قد لقب بهذا لبشاشته و سماحته فالابتسامة على محياه و الضحكة ملازمة له
و قيل فيه الكثير من الشعر و مما قيل فيه
يقول الشاعر شيحان الزبدة

الهـــجن هــــجن بهــاليهــن=مــتنــويــات بتنكــيفـــة
ما يلــــحـق الــذيب تــالــيهن=يبن فـهــد والــم الـضيــفـة

و منهم : محمد بن سعد بن محمد السيف رحمه الله
(( حاتم الصخى)) :

وقال فيه معيفن التبيناوي :

ياماحلى بني الغرايب على الكيف=وأبو فهد يامطير سيرة مشدّه
طراه كثر الرجل بالشبط ومحيف=وحاف الزمان وشفت ناس تردّه
وبانت فوايه حلوةٍ عند إبن سيف= لياجوه هتاش البراري يمدّه
مْهبوب ريحٍ للمسايير والضيف=كريم سبلا نافلٍ كل بدّه
للممحلين محمدٍ بالدهر ريف=ماهو من اللي لقمته بس قدّه
ولا هو ثميدٍ صروته بأول الصيف=عدٍ ليآمن تنفصخ كل شدّه
ولا به لياحلّت طواريه ياحيف=أبو فهد من عد الأجواد عدّه
لاجوهجافا فوق مثل الشواحيف=يجيب ماحاشت يمينه بكدّه
وحلوٍ و مرٍ بالدلال المهاديف=أناسة اللي يركبون الأشدّة
بشواميٍ يطرب لهن راعي الكيف=الله على الأجواد ييْسر بمدّه
وحقٍ حقيقٍ عدمابه لياشيف=مثل هاكالي دون ربعه يسدّه

ومنهم: غازي و سعد و عبد الرحمن(دحيم) أبناء
عبد العزيز السيف رحمهم الله (( أهـل المـنـاخ))


و قيل فيهم الشعراء الكثير ومما قيل فيهم : قال الشاعر : سلاف الذرفي الشمري منها

شبتوا على طيبكم يالسيف=لياشفتوا الضيف حييتوا
يوم الردي مثل برق الصيف=وانتم على الطيب عييتوا

ومما قيل في قصيدته الشاعر ابن هادي ومنها:

السيف كلٍ يفج الباب=لياجنّب الضيف يدعونه

وغيرهم من أهل بيقعاء ممن أشتهر بالكرم
وحسن الإستقبال والبشاشة في وجوه الضيوف لا يتسع المجال لذكرهم
وقد أولفت في كرم أهل بقعاء الكتب والدواوين

ثم بعد ذلك تكلم فضيلة رئيس المحكمة المستعجلة بحائل
الشيخ طارق السيف

ثم القاء الشيخ الأستاذ محمد العبدلي
كلمة تكلم فيها عن فضل الترابط و صلة الرحم و عدم التفاخر والطعن في الأنساب
و كذلك قصيدة بهذه المناسبة :

ثم القاء الشاعر/ سعود السيف قصيدة بهذه المناسبة:

بسم الولي أبداء على كــــل ابو حـــــال=الـــــــي خــــــــلق خلقه وكلٍ لحاله
وجــــعل لنا شعـــوب وقبـايل للأجـيـال=لأجــل التـعــارف ثم نهى عن قتاله
وبيّن لــــــــنا لآفــرق إلا بالأعــــــمال=وأكرمــــنا أتقانا لــــــــــربْ الجلاله
وكتبت هالأبيات تـشــــــــرح للأحــوال=سيـــرة حياة السيف حسْب إحتماله
حنا ربينا باللواء واللـــواء رجـــــــــال=ومعـروف كـل وقــت وزمن له رْجاله
معهم لــــنا ميتين عـــــــامٍ ومــازال=وهــــم من قــــديم وجارهم له دلاله
كــــــــدْ قالها شايع الأمسح من رْمــال=ومــدحْ لجــيرتهم بوقــــــتٍ مضاله
مْــــدلـهين الجار في حــــــــلو الإقبال=ومعــهم تـزين أحـــوال منهو لحاله
وفي راعــــي بقعاء بريك بيطار الامثــال=وخــــميس خضـــاع العداء بالبساله
وعــــبيد لـــه صــوله وجولـه وكم نـال=رفعـــة لــه البيضــاء و بالفعل طاله
و فـهد الحمد يدعونه الضحيــك بإقـبـال=إمـــيرها يــــــــوم إن الأخــوان صــاله
لهــم إرتكا من نابي الجال للــــــــــجـال=وطــــالت علـــــى وقفــــت رْجاله حباله
وقــــــــفْ إبن برجس وإبن سيف الأبطال=بـــموقفْ عــــــضيم وجنبوهـــا الجهاله
ويستاهلون التضحية وأصلـــــــهم دال=مــن إســاعدة الهيـــلا ونعم السلاله
ويبقون أهلها وأهل جاهٍ وأهل مــــــــال=وإمـــــــارة الـــــديره خلف من غداله
ولو أبي أعدد وأذكـــــــــر لطيب الأفعال=مــــــن الصعب أوفّي رْجالها وإستحاله
لكن أبوجز لأجـــــــــل شيٍ على الـــبال=وجــــواب كــــــافي لمــــنْ علينا سواله
حـــــنا هــــنا فيها مــــن عْيال رجــال=هــــو جـــــدّنا الــــــــرابع وحناّ عْياله
وإبوه هو شيخ الجبل قول وأفــــــــــعال=ونصــــــــــّبْ مـــن الدوله وكلٍ دعاله
ومن وقتها وحــــــــــــناّ هنـــياّ ولازال=وطابت لـــــــنا من طيب مــنهم رْجاله
كرام اللحاء طلقين الأيمان مــــــــــدهال=أهـــــــــل كـــــرم للـــجار واللي لفاله
عز الصديق وويل من حــــــــــولهم عال=وأهـــــل جمـــــيل لْمـنْ يعرف الجماله
ولو مابـهم من وقــتها أطيبْ خْـــــصال=والله ياراس الــــــــــوايلي مايهناله
لكن لــقاء بـديار الأجـــواد مـــــــــنزال=ومــنـــهم وفيهم صار من طيب فاله
وأشْهد شهادة حــــــقْ هالـــــطبع لازال=ومعــــهم مْزارق طيـــب لآجاء مجاله
هم يفخرون ومثلهم نفـــــخرْ بْـحـــــال=وكــــــلٍ عــــلى مافـــيه مابه جْداله
ويكفي فخر إن جــــدّنا محمد لْـــــــــحال=يـــــوم الــــــــردي همّه يجمّع بماله
كريم سبلا بوقت فيه أشهب الـــــــــلال=والـــــــــــناس جـــوع وكلٍ أعلم بحاله
من الجود سمي بوقته وطيب الأفــــــعال=بـــــحاتم صـــــخا وريف الهجافا مثاله
خْبال عنزة بالطيب ياحيّه خـــــــــــبال=وكـــــلٍ علـــــــى مافـــيه تطلعْ عْياله
ياكـــــــم شـــاعر جاب طــــاريــه بجْزال=بمــــدح الثـناء من أهل قصيد الجزاله
ومنآ هل المــــــــــــناخ ثلاثة رجــــــال=نالـــــــــــو لـــــــعلمٍ غانــم وله دلاله
إلين شابو طـــــــــــــيبهم غيث وخْيال=أهــــــــــلْ مضيف لكــل منهو عناله
في وقتهم لـــــــــوهم من اللي ورى المال=واللــــــه لنــــــــبلشْ كــلنا في حلاله
ولاتواخذوني قمْـــــــــــت أبجّل للأحوال=لكــــــنّي واثق ياعنــــــــزة من قْباله
أدري بكم إن ودّكم تبقا ألأجـــــــــــيال=من طيــــــــــــب أكالويلان زود الولا له
وهذا الصحيح وكلْ ماقلت ينـــــــــــْقال=ويذكــــــر لزيــــنه في رجــال الشكاله
والناس تدري بالجدايد والأســـــمــــــال=مــقـــــــــــيولةٍ قبــــــلي لْياقيل قاله
والـــــــيوم نحْمد عالم الْحــــال بالحـال=في ظـــــــــــل حـــــكامٍ بحكمْ العداله
يبقون فوق الكل في منزلٍ عـــــــــــــال=ويديـــمــــهم ربّــــي عـــــزيز الجلاله
وختامها ليـــــــــــابعد راس من قــــال=لـــــــكم إســـــوق العذر لأجل الإطاله
وسلام خالص كــــــــثر ماجاء على البال=وعـــــــــداد ماشــــــيٍ تحــــقق بباله
من شـــاعرٍ بالحقْ لاقال مــــــــامــــــال=لعـــــــيال عــمْ ومن عمــــامه خــواله

ثم بعد ذلك القاء الشاعر الكبير عبدالله بن عبار شاعر قبيلة عنزة ونسابها عدة قصائد:

الجاش هاض و لطف القاف تلطيف=والفكر يملى من معاني كلامه
شوف الرفاقه يجلب الأنس والكيف=اللي بمجلسهم تطيب الأقامه
من وجّه الدعوة معزه وتشريف=عسى ولي الكون يرفع مقامه
ابن سماح الوايلي مكرم الضيف=أحمد سليل جروح ساس الشهامه
قدمت له شكري و لا قلتها زيف=قرم العيال اللي بعيدٍ مرامه
مشكور من خلا الضماير مواليف=اللي شمل ربعه يريد التمامه
كرّم رجال السيف و النعم بالسيف=أهل المراجل حافظين الكرامه
لأجل التواصل من جميع الأطاريف=تجمّعوا والكل زاد أهتمامه
ماهمهم كثر التعب و التكاليف=الكل متشّوق لْشوفة عمامه
في حايل و بقعاء لقاهم كما الريف=يابعدهم عْن الردى والملامه
و اليوم في دارالرجال المزاهيف=اللي سْلوم الطيب تفهم نظامه
وأمدح رجال السيف ماهم هذاليف=من ساس لابه مابعرقه رخامه
لابة مسيك مكمّلين التواصيف=عاداتهم يثنون دون الجهامة
يوم المراجل بالسيوف المراهيف=عوق اللدود اللي براسه زعامه
دخيلهم يبعد عن الذل والحيف=كنه بعيطا من شوامخ تهامه
إبن الشليمي شاف غلب الملاقيف=وزبن عليهم يوم دانيه ضامه
وسمير إبن زيدان طاح بمهاييف=ومن حين جاهم صاحبته السلامه
ياكثر لرجال المسيكي مواقيف=يوم الرجل يفعل بشذرة حسامه
الأسحم اللي من هاك اليوم ما شيف=روحه فدا للجار قرر عدامه
وعبدالله جْلادان مايريد تعريف=الترك تعرف هيبته وإحترامه
وهدلان له في صايب الراي تصريف=راع الدوا المنعور مابه غشامه
يصعب نعد المجد بالفعل ليشيف=ومدحي لهم به عز ماهو ندامه
والكل تعرف ميزته بالتصانيف=ربْع المسيكي من ضنا عبيد هامه
من عزوةٍ منزالهم بالمشاريف=ياسعد منهم باللوازم حزامه
أعني هل العرفا لهم جمعٍ إيخيف=دلاق يسحق كل من جاء أمامه
كان أعتلوا فوق الكبار الهراجيف=نطيحهم ما ينقلنّه عظامه
أفعالهم ما هي عواري و تسليف=مثل القمر ما يتّقي بالغمامه
والمجد يذكر بالمجالس سواليف =ما ينمحي حتى تقوم القيامة
ومن يترك العليا تكاسل و تسويف=هيهات ماظني يسره منامه
أقولها ولا حرّف القول تحريف=وماضي فعايلهم لقولي دعامة

.
.

ثم القاء الشاعر منصور نايف العنزي عدة قصائد



ثم بعد ذلك القاء الشاعر قناع بن ناصر البرجس ( الخضاع ) قصيدة بهذه المناسبة :

سلام ياجمــع الوفـاء ياهل الطــــيب=يالـي توارث طيبهــا من عربهــــا
سـلام شـاعــر رتـب القيــــل ترتيب=ياخـذ جــزيله والهزيــــله شطبهــا
اهـــداه للضيفــــان هــم والمعـازيب=والحاضرين والسامعين احسبهـــــا
لبيت للـدعــــــوه وانا حـاضــر اجيب=دعــوة رجـال جزلهـا في وجبهـــا
سيـف الصخـا من دون شك ولاريب=اللي تعـــلو في معالـــي رتبهـــــــا
اهـــل المنـاخ بطيـب ماظين تجريب=كسبــوا ثناها يــوم محــــد كســبها
تجــــودوبالمرجـله بالمقاضــــــــيب=يوم السنـــين القشــر تكرب حقبهـا
ماقصرو سيـــف الكـــرم بالمواجيب=عقب العشى للضيف زهّب رطبها
نشهــد لهــم بالطيب شبّان مــع شيب=عْلوم الفخر فيهم وكل(ن) قضــبها
فعل(ن)وطيب ودين نزهين عن عيب=هرج(ن) وكاد وشاعــره ماكــذبها
وهبه من الوالـــي وبــذل وتســابيب=يســتاهلونه يــوم ربـــي وهبـــــها
قلتــه وانا مالـــي عن الحــق تجنيب=من لابة(ن) شروى الحضورانتسبها
أهل الصفاة اللي بـروس الشخــانيب=مجده على صفـــحاة مجـــده كتبها
اصدع بحق(ن) ويْهبى كل كـــــذّيب=يوم الكـــذوب خــــيول كذبه هذبها
اقرب من الطيب حصان الاطـــاليب=لشرواكم اشفــــق والعفــون اعقبها

ثم بعد ذلك القاء الشاعر حاكم العواجي عدة قصائد



ثم القاء الشاعر الحميدي النبات بن صنعاء العنزي عدة قصائد ومنها

سلام ياللي بالمراجل لكم شان=وسلام ياهل الطيب في كل طايل
ياهل الوفاء و الجود خطلان الأيمان=ياهل الصخى يامروضين الأصايل
ياهل الكرم والطيب عطبين الأطعان=ياهل الشجاعة ياحمات الدبايل
وهذا المساء بين المناعير قد زان=عند السيوف العز و أهل النفايل
نطّاحت الكايد مواريث عقبان=الكل منهم للجزيلات نايل
بهم المروه و الكرم زائد إحسان=وفْعولهم تفوق كتب السجايل
السيف سيف العز بيدين شجعان=وانتم سْيوف المجد والطيب هايل
مسكا رْجال الطيب و الفعل برهان=طالوا طويل الصيت يوم الفتايل
زبن الدخيل ابساعةٍ شرّها حان=كنّه بعيطاء عن سموم القوايل
وزبن اللذي ما يريد للحق عنوان=دور مضاء بالعق ماجاه صايل
تشهد لهم بالطيب حضرٍ و بدوان=ما عاش من عادوه والدم سايل
واقرد حضّه كان حطوه نيشان=يذوق مر الموت ماعنه سايل
و علم الفعايل فوق قولي بالالحان=فْعولهم ما تنحصر بالمثايل
عيال سبعٍ للجزيلات مزبان=خيّالت العرفا قهر كل عايل
عدوهم ماإرتاح من ماض الأزمان=يركون جوفه فوق حام الملايل
وعز القصير مدلهت عنف الألوان=ريف الخوي و الضيف يلقى الجزايل
و صديقهم يشوف عزّه ولا يهان=وخصيمهم يصلاه شوب الهوايل
كرام النفوس أهل الوفاء طيب و كدان=وتارد على الموت الحمر بالصقايل
من لابةٍ تعرف اليا قيل ويلان=تاريخهم مشهور والجد وائل
أهل المفاخر والفخر سرْ وعْلان=وما ينحصر مجدٍ بنو له فعايل
وبشر و مسلم يوم روغات الأذهان=سقم المعادي مابهم قول قايل
و أفخر بربعي صيتهم للملا بان=وكل قوم إلا عنزه و الشك زايل
و كل القبائل مابهم قول نقصان=كلٍ بحقّه و الفعول الدلايل
اهل المكارم و الشجاعة و فرسان=نالوا جزيل الطيب كل القبايل
والله يديم العز لصقور حوران=حكامنا الوافيين عز وفضايل
في ظل عبدالله سلايل كحيلان=عْن المواطن شال جل الثقايل
وو لي عهده شامخ الصيت سلطان=عز الضعيف و للمعادي نكايل
و منكم سموحه كان بالقاف غلطان =و نعمٍ نعمّـم به جميع الحمايل
و صلاة ربي عد هتاف الامزان=على الرسول اعداد و بل المخايل

.

.

.

وقال الشاعر/كريم رحيل العنزي

عندي ثمان أبيات تمجيد للسيف=بالحفله اللي نورها غطا الأنوار
جينا نشارككم معزه و تشريف=عيال عم و قوم حسبه و مقدار
و من جالهم بالحفل ما يعتبر ضيف=أخوٍ و جاء لأخوان وافين و أخيار
و ربعاً لهم عند اللوازم مواقيف=و لا هو غريب الطيب من نسل الأحرار
ماهمهم بالطيب كثر التكاليف=ياكثر ماجوهم على الطيب زوار
فْعولهم تعرف و ميقافهم شيف=و أكبر دليل اللي نشاهد بالأنظار
أولاد و ائل فوق كل التواصيف=و لاهي مهونه للقبائل و لا أنكار
لكن تبون الصدق من دون تحريف=ما يستوي تقصد و فيه إبن عبار

.


.


.





ثم بعد ذلك ألقاء الشاعر /حسين محمد العنزي



ثم بعد ذلك ألقاء الشاعر / فهد عبدالعزيز السبيعي



ثم بعد ذلك ألقاء الشاعر / الشبل أورنس حمود الخمشي قصيدة بهذه المناسبة



جانب من الحضور