لاباس ياقلبي من الضيم لاباس

لابـــاس يـاقــلـــبــي مـن الــضـيـــم لابــــاس=وش حـيـلـتــي دام اللـيـالـي عـنـيـده
وش حـيـلـتي مادمـت من جـمـلـة النـاس=والـوقــت حـاديـنــي عـلـى مايـريـده
حـالـة كـسـيـر(ن)عـاقـتـه قـب الافراس=فوقـه شـجـاع الـقــوم والا عـقـيـده
يشكي وجع ساق(ن)غدت تـقـل مقواس=وان صـاح صيحـات الخـلا ماتـفـيـده
فـي لاهـب الـجــوزاء والاريـــاق يـبــاس=الــحـلـق يـابـس والــمــوارد بـعـــيــده
جـمر العـطـش في ضامره مثل الامواس=والـروح بـشـمـوس الـقـوايل وحـيده
ارض(ن)يحوفه بالدجى ذيـب الاطـعاس=اللي يـقـاسـي بـه وقوت(ن)شديده
يـطـوي صـحـاصـيـح الـفـيـافـي والارماس=والـجـوع وسـط الـكبد مثل الوقيده
مـالـــه تــحـــت نـــار الـبـــواريـــد مـجـــلاس=ورزقــه عـلــى اللـي مايـخـلـي عبيده
حـالــي مـثـل حـالــه تـحـت كل هوجاس=وماراح من هـجـسـي غـبـونـي تعـيده
هـجـس(ن)حرمني من مقاعيد الاوناس=وفي كل يوم(ن)له جروح(ن)جديده
مـنـها سـهــر عـيـنــي وهـرجـات الانجاس=مثل الـمـنـاجـل فـي هـشيم الحصيده
الـلـي غـدى عــنـــد الاجــــاويــد بــلاس=والـصـبــح يـرســل بـالــخــبــاثــه بـريــده
من صاحــب(ن)دونــه مـقـافـل وحــراس=وناس(ن)نـفـوسه بالـحرايب زهـيده
حـطـوا لـهـا عـقـد الـحـبايل والامراس=ومن قارب الغالي شباكه تصيده
لاوالـلـه الا حـال مـن دونـه الـيـاس=ياس(ن)سكن بالقلب يشفط وريده
شاد القصور بـغـبـن قلبي على ساس=يودع جروح القلب ينزف صديده
ويلي عـلــى اللي كـنـهـا عـيـن قرناس=له مخلب(ن)يـمـزر عروق الطريده
عينه تشوف بـنـايـد الروض مرواس=ويودع فروق الصيد ماله شريده
اصفى من الجوهر على عقد الالماس=حدت شجون القلب تنثر قصيده
وصبيت قـيـفاني على بيض الاطراس=ماهـي خرابيط الخبول وعصيده
واصبح لـعـقـال الـشـواعـيــر نـبـراس=ولو يدخل الـمـليون يصبح عميده
تشبه طعون كليب من رمح جساس=وراحت حياة كليب منها فـقـيده
لا شاب قاف اللي شكى نار الافلاس=واعـلـن بـقـيـفـانه نـهـاية رصيده
جبت الشوارد من ورى حد تكساس=وسط الجبال اللي يهيلك جليده
والا غـديت لجـزل الامـثـال غـراس=وان ماقـنـع راع الـمـعـانـد نـزيـده
مانـي بغـلـقـات الـتـمـاثـيــل مـحـتـاس=ولا رحت للـقـيفان وسط الجريده
ميراث عـود(ن)له على الـربع نوماس=والـقـاف يشـهد والخـلايق شهيده
طيبه بوسط اهل الجبل يرفع الراس=وحـروف قـافـه بالمراجل سديده
اسقى ضـمـيـري من قوافـيـه بالكاس=وزدته بـجـزلات الـورود الـفـريده
يـشـبه قصيد فـهـيـد وعـبـيـد ودباس=اللي مـزايـاهــا الـحـمـــايــد عـديده
وبعض العرب ماهي للاشعار مقياس=دام الـنــوايـا فـيـه مـاهـي حـميده
مااطـيـع انـا بالـنـقـد دايـس ودربـاس=دام العرب فيها عـقول(ن)رشيده
وانا بـلاء حـالـي غـلاء زيـن الالباس=اللي برمش العـين تـرمـي ضديده
طـيفه يزور البال في وقت الادماس=يسري على روحـي ويـلـعن كديده
يـطـرق خـفـايا ضـامـري طـق هواس=اللي تـشـق الـقـاع رجـفـة حديده
ويرجف بروح(ن)كلها شوق واحساس=وان داج بارواح النشاما يـبـيده
مطـروحـهـا مايـغــفـــي الـلـيـل بـنـعاس=يرجـي وعـايـدهـا ويـخشى وعيده
مثل العنود اللـي خـذت عـقـل عباس=وعمره قضى يشكي رموشه وجيده
وهذا سـبـب قـولــي لـلاحـباب لاباس=وقـولــي تـرى طـبـع الليالي عنيده