اتعبني الحلم لين الواقع انكرني
كني مسكت الفرج بيدي ..وهديته
مافيه داعي على فرقاك تجبرني
حتى الجفا منك ولعني وحبيته
الجرح عدى زمانه..لاتذكرني
هذاك وقت تعذرته وجافيتـه
لو شفت دمع القصايد كان تعذرني
تصور ان الشعر يضحك وبكيته
ماغيروني ياكود الله يغيـرنـي
كم واحد عنك يبعدني ورديته
وفيت وادري وفايه ما يصغرني
صوبت يم الهـدف لكن اخطيته
من طار سرب الغلا..والشوق طيرني
كن ماعلى الارض واحد ماتعديته
خذني على صدرك الدافي..وسيرني
بعض الولــع ياخذ الرجال عن بيته
ابنشغل في عيونك..لاتدورنـي
ودي بشي اشوفه..مابعد جيته
خليت قلبي معك والله يصبرني
مبطي وانا اقول قلبي وين خليته
نسيت اعلمك طيفك جا يسهرني
بس انت ماشفتني شلون ضميته
اشتقتلك ..مابغيتك عاد تشكرني
تغيب والشوق عمري ماتباطيته
العام يوم الوعد تسبق وتنطرني
مستغرب شلون هالموعد تناسيته
وين انت رايح ولاكنك معبرني
ماكني اللي على العالم تمنيته
لاصار هذي علومك..راح تخسرني
ماعمر احد راح من كيفه وناديته
عند الكرامه ابيعك وانت خابرني
الله وكيلك ترى كل شي مريته
كانه هجـــر بالسلامه.روح..واهجرني
اخــوي لاصد عنـــي ماترجيته
العرض الشجري
