قصيده اللقب......ياكبيرة مايوفيك اللقب

ياكبيرة مايوفيك اللقب
إنتي أكبر واللقب عندك صغير
القصايد لنور وجهك تنتصب
وكل معنى دامك إنتي به كبير
ياحبيب الروح مابهذا عجب
ماكذبنا لا ولا خان الضمير
يشهد الله ومن ظلم حظه كذب
وش يضر الشمس لو يجحد ضرير
الذهب ما يصفي إلا باللهب
ولولا درج النبع ماطاب الغدير
كل قلبٍ يا حبيبي ما يحب
قلب ميت ماهو بالدنيا جدير
إنتي لي حبي وروحي والهدب
وإنتي قلبي وإنتي لي شوف النظير
ما أقول إنتي يزينك الذهب
الذهب لولاك قولي وش يصير
إنتي مذهب والذهب به ما ذهب
معدنك نادر ولا يبغى خبير
البشر في كل مذهب تقتلب
وإنتي اللي مذهبك ما يستغير
في جبينك برقة السيف الحدب
يا تلالا كل قلبٍ به يطير
وفي عيونك موت ونعاس وتعب
وفي رموشك طعنة الرمح الشطير
والبرد مع جمرتينٍ تلتهب
في شفايا كلها شهد وعبير
ويا انتثر ليل الجدايل واستتب
أشرق الوجه الرضي بدرٍ منير
ياحلو زولك ليا خف ولعب
مهرةٍ من شوف ظله تستذير
وقدك اللي يا تمايل في طرب
كل عينٍ شوفها يرجع حسير
عود ريحانٍ على نهرٍ يصب
في صباحٍ يبهج القلب الكسير
يا حلو نفحه ليا هب المهب
مع نسيم الليل ياطاب المسير
ياهني من جاك هايم واقترب
أشهد إنه مايبي غيرك عشير
ياحياة الروح جوهرة العرب
ياملاك الحب والطهر الستير
حشمة وعفة ومقدار ونسب
والجمال اللي غديتي له سفير
لأنك أكبر مايوفيك اللقب
اللقب ياغالية عندك صغير

الشاعر: عبدالرحمن سعدي الغيثي