قصيدة .. لنا الله ..

اخواني واخواتي الشعراء الافاضل

اهديكم هذه القصيدة الغزلية وهي من القصائد التي لم تنشر من قبل

لا في دواويني الثلاثة السابقة ولا في الصحف والمجلات ولم القيها

في اي امسية لأن القصيدة وبصراحة تحكي موقف قد مَر وانقضى

القصيدة بعنوان (( لنا الله )) والقصيدة من الطرق الهلالي




لَنا الله .. ليالٍ تركنا رقـودها
مع سَمرَة الأحباب ..نظرات سودها
لنا الله يا ليلٍ سهرته وخاطري
مرتاح ..والشدّات راحت وكـودها
لحظة لقيت اللي تسلّي عن الملا
تعانقت روحين وأقبل سعودها
أجمل سهارى العشق في ليلة الهناء
من بعد فرقتنا جمعتنا وعـودها
عمار يا وقتٍ سقاني من الحلا
من رشفته تشفا خوافي لـهودها
سهرت لين الصبح أكحل عيوني
وأقول تحلا في وجودك سهودها
أقضي معه ليل السهر ليل فرحتي
أوسّده عضدي وأنا لي عضـودها
بشفاي أبيّن كبر شوقي ولهفتي
وبشفاه تظهِر سرّ حبّ لـودودها
تحكي لي ظروفه إلى صرت غايب
لا أبعدت عنها وش همومٍ تسودها
تقول حبّي لك مَلَك كل فكري
ولا عدت أداري عن مشاعر حقـودها
تبكي على صدري بكاء الشوق والوله
تقول بوداعك همومي تـزودها
تمسك يدي وتقول ما أحبّ روحَتَك
ليت الليالي ما تبيّن نكـودها
لا ..لا تشوف العين بالعين دمعه
لا سال كحل العين يحرق خـدودها
ينتابني حزنٍ بلحظة موادعك
تكفين .. لا يفرَح علينا حسودها
يا كبر مأساتي ويا ضيق صدري
ويا صعب فرقاها ويا كود كـودها
يحّول أنا مالي نصيبٍ بفرحتي
حتى يجي قدرٍ يبعّد حـدودها
قالت أخاف إنّه يجي من يغيّرك
وتنسى هواي وعشرتي ما تعـودها
قلت الله اللي عالمٍ ما بداخلي
وهو الذي روحي لحبّك يقـودها
وشلون أنا بنساك يا نور دنّيتي
يا كلّ مأساتي وغاية نشودها
ما دام باقي نبظةٍ في عروقي
ما أنساك يا شبه المهاة وعنـودها
ألاّ يفرّقنا من الموت داعي
وتحطّ هالأجساد داخل لحـودها
أبترحّم كل ما حلّ ذكرك
ومخطور أنا عيني تحارب رقـودها
وإن كان وافتني بعيشك منيّتي
ترحّمي لي كل ما هبّ نـودها
خَلّي البشر يحكون قصة هوانا
ماني بالأول من ضحايا ورودها