:| وجه الموآني |: جديد البركآت

قصيده من جديد شآعر الإحسآس الجميل و الكلمة المميزة ..
للعآدي جدا ً / بركآت الشمري ..

يا حزينه ..
دوريني في زوايا الياس .. في ياس المدينه
دوريني / في ملامحك وجهك الدافي وقولي

قولي وينه ؟
شاعرٍ ماحبته بنت / وبكى
شاعرٍ مانسّته بنت / وشكى
شاعرٍ يركض ورى الأحلام .. والأحلام تهرب من يدينه

دوري عنه دخيلك في : المرايا
في وجيه .. احلى الصبايا
في النوايا ..
في الزوايا ..
في الهدايا ..
في الزهور اللي تحبك .. فلها مع ياسمينه ..

دوري عنه دخيلك في / صباحك
في دموعك .. وانشراحك
وسط / حزنك
وارتياحك ..
وسط دفتر مل من نزفه ومن دمعات عينه

دوريه
فالوجيه اللي تنادي فالغيابات .. الوجيه
فالحنين اللي ابيه .. وفالأنين اللي يبيه
ولا بكى حزنه عليه
ولا بكيتي تذكرينه

دوريه ؟
في عيون اطفال .. مروا وابتسامه
وسط صمته
لا جفا صوته / كلامه
وسط دفترك الحزين ..
يوم كنتي تكتبينه يوم صرتي تشطبينه

دوريه
لا غفى سمعك على صوته ونام ..
فـ السكوت .. وفـ الكلام ..
فـ الحمام اللي بصدره يوم طيّر لك / حمام
في ملامح .. صبح بارد
كان بيدك / تشعلينه

اسألي عنه يدينك
واسألي بينك وبينك
كيف مر فـ يوم عينك لين مات / احساس عينك ..
وانتي عينه

ياحزينه ..

واتنفس رغم هذا الضيق في صدر المدينه
...................... واتبسم حتى لو مانه عصافير واغاني

وانتي انتي مثل ماانتي ولكنك حزينه
...................... تربكين الدمع ويل والدمع من ضيق المحاني

صح انا مااخترت اكون انسان يمكن تعشقينه
...................... بس انا ماخترت اكون الا معاك انسان ثاني

كنت اقول البحر ماينشد عن هموم السفينه
...................... صرت اقول الحين دلوني على وجه المواني

آه واللي خالقٍ بي صوت يصعب تسمعينه
...................... ماقطفتك لحظةٍ حلوة من اغضان الثواني

اشبه احساسي ولا اشبه هذا اللي تبينه
...................... شاعرٍ من ضعت عندك ضاع يوم انه لقاني

اشبه اللي مر في صدري وانا مدري حنينه
...................... مثل هذا الفرح وهذا الجرح لامنه بكاني

انسكب لك شي مثل المي يمكن تشربينه
...................... وارتوي بك شعر مثل الشعر لامنه دعاني

مثل هذا الحزن هذا الحزن لامر بـ سكينه
...................... مثل هذا النور مثل شعور من يدي خذاني

مثل هذا اللي يدور في يدينك عن يدينه
...................... مثل هذا اللي يمر الحين كل اللي قراني

مثل هذا اللي يحث خطاه ماتلحق سنينه
...................... مثل هذا اللي تشوفي كيف لو شفتيه جاني

شاعرك لو ماتنفس ضاق به صدر المدينه
...................... شاعرك لو ماتبسم كان مارفت اغاني

افتحي قلبك وشوفي وش ورى دمعات عينه
...................... يمكن تحسين باللي ماقوى ينطق لساني

لا يمر الحزن مثل اللي يمر وفي يمينه
...................... قلب ماتنبض سنينه مثل نبضات الأماني

من يقول الصبح هذا صبح واشياءه حزينه
...................... من يقول الناس مثل الناس ماحس بحناني

الحزن ماهو مثل ماشعر واحسك تشعرينه
...................... الحزن لا جيت ادور لك وانا اجهل مكاني

ياحزنها
رتل معي / تنهيدتي
لا جف فوقي .. مزنها

رآقت لي ..
و أتمنى أن تعجبكمـِ