قصة عفـاف

[poem=font="simplified arabic,4,black,bold,normal" bkcolor="transparent" bkimage="" border="none,4," type=2 line=0 align=center use=ex num="0,black""]

اسمعوا قصه .. بطل قصتي هذي عفاف=من سببها عاشت العمر شمعه طافيه
يوم كانت ورده وجالها جني وقطاف=أملت شروطن مع اعرافنا متنافيه
وابتعد حظ المسيكينه وولى وخاف=يرتجي من لاتبي غير شرط العافيه
وذبلت وردة شباب البنيّه من جفاف=السنين اللي روتها تنحّت هافيه
والقطار اللي تحرّاه عدّاها وطاف=مانفعها ركضها خلف دربه حافيه
وفي محطة سكته مالها إلا الإعتراف=حدّها التاريخ تشكي على الجغرافيه
وسرحت تسترجع اللي مضى بليا نكاف=وارتخى رمش الهدب فوق بحر الغافيه
وحلمت في لبس طرحة وفستان الزفاف=يوم زفوها على انغام لحن القافيه
والعريس اللي تحرا ملايينه بالاف=جا بحصانه ثم خطفها بأقل من ثانيه
والهدايا طوّقتها على كل اختلاف=والخدم من حولها والحشم متقافيه
واستمر الحلم يرسم أماني ماتشاف=والحقايق عن فكر هالبنيه خافيه
واستفاقت بعد حلمن محاصيله عجاف=الحلوم اضغاث ماهي حقيقه شافيه
واستعادت ذكريات الشباب اللي تعاف=يوم جوها وانطروها لمده كافيه
كانت اتقول انتم عقولكم والله خفاف=ماخطبني غيركم يالشباب الحافيه؟!
لين صارت عانس وسنها ولى جزاف=والقرايب والأحباب تولت جافيه
ومن يعيش الحلم لاصحى عاين وشاف=الحقايق ماتخبى ونسبها وافيه
يابنات احلامكم لايغطـّيها غلاف=شوفوا الدنيا بليّا حلوم وصافيه
خوذوا العبره.. ومن تشترط تلحق عفاف=والعمر باقيه تقضيه شمعه طافيه


[/poem]