شيخة شمّر ..

قصيدة الشيخة ( شيخة شمّر )

قصيدة الشاعرالامير
عبدالله بن علي الرشيد
هو الأمير الفارس الشاعر / عبدالله بن علي بن رشيد من آل خليل من الجعفر من الربيعية من عَبدة من شمّر ,ولد عام 1204 هـ وتوفى عام 1264 هـ وعُمره 60 عام , وهو مؤسس إمارة آل رشيد في حائل فقد حَكم من عام 1252 هـ إلى عام 1264 هـ ومدة حُكمه 13 سنة , وهناك عدّة عوامل ساهمت في نجاحه منها القيادة والشجاعة والكرم والحكمة والدهاء , قال عنه الفاخري : كان صارماً مهيباً أرجف الأعراب بالغارات حتى خافه قريبهم وبعيدهم , ويقول عنه ضاري الرشيد : لم تكن القوة والمال وحدهما سبباً في نفوذه بين العرب بل كان لصفاته الشخصية وشجاعته ورجولته وعدله ومحافظته على وعده وحسن ضيافته , وعبدالله بن رشيد شاعر له العديد من القصائد التي تبين مدى شجاعته وفروسيته .


مناسبة القصيدة :
(( أرسل الإمام فيصل بن تركي آل سعود رجلين هما فرحان وابن سبيت لتسوية الخلاف بين حائل وعنيزة , وقد سبق وان حاول اهل عنيزة قتل عبدالله بن رشيد غياله عندما ارسلوا له رجل يقال له ابو هادي وتنكّر بزي رجل غريب , ولكن تصرّف عبدالله وهجومه على عنيزة أغضب الإمام فيصل بن تركي ولهذا السبب أرسل الأمير عبدالله بن رشيد هذه القصيدة إلى الإمام مع وفد يشرح ما جرى بأن أهل عنيزة هم المعتدون وحاولوا إغتياله عدّة مرّات وعلى هذا الأساس قام بالهجوم عليهم , مشيراً الى الصحبة التي بينه وبين الامام فيصل بن تركي وانه من رجاله المقربين وانه هو الذي قتل مشاري ومهد الحكم لفيصل بن تركي )) .


الحمد للباري فزع من شكاله
والحمد له ثاني على كل الأحوال
والحمد له ثالث بقدرة فعـاله
حمدٍ كثيرٍ عِدّ ما قايلٍ قال
أو عِدّ ما فوق الوطا من رمـاله
وساح الظلال من العوالي للأسهال
أو عِدّ ما ترمي لواقح خيـاله
بسحٍ وتسكابٍ وديمٍ وهمّال
كل الشكر له والثناء والجـلاله
سبحان منهو كل ما راد فعّال
رب السماء رزق الملا من نـواله
محيي الهشيم الميّت الدارس البال
مولاي عازل شمسها عن ظـلاله
سيدي ومسنادي إلى ضكّن الجال
كم ضيقةٍ من منّته جت وزاله
وعادت بعزٍ ما هقيناه بالبال
الحمد لله ما كرهنا لقـاله
ألاّ إن تصير عقوبته عزّ وأقبال
يا ما طلبنا كل من به شكاله
نبي الركود من أهل نجدٍ ولا ضال
من عقب ما عجزوا بسعي الختـاله
شبّوا لنار الحرب بالقيظ صوّال
ومن شبّ نار الحرب قاد إشتعاله
وصارت عقوبتها بعد ذلّ وذلال
هذا وفعل الشرّ للي سعاله
يرميه بالميدان من غير حبّال
والبغي كم ناسٍ خلوا من رجـاله
يا ما هَلَك بالبغي من ماضي أجيال
عادٍ خلاف الزود شف وش جـراله
يا عونة الله ما من الحيّ عقّال
من قال ذا فعلي فهو من هبـاله
الله معاوني على من عليّ عال
اللي نبي لولا الولي ما ننـاله
مار الولي يسعى والأنام غفّال
والكل يكتب بالقلم ما جـراله
شرّه وخيراته من الخالق العال
يرفع وياضع بالقدر من نـواله
وتدبير خلقه ما لنا فيه مدخال
اللي علينا الجار نرفى خمـاله
ونفزع لمن جانا من الظيم دخّال
والضيف يقرى حين تبرك رحـاله
من غير هذا المحتري ما نهج خال
ومن جاء يريد الزين يعطى سؤاله
عن عاني الله ما قطعنا له أوصال
وإن جاء صديقٍ من عدوٍٍ غيـاله
عميلنا نرخص له الحال والمال
يأمن بنا سرحه وضايع حـلاله
ولا بات في قلبه من الخوف ولوال
والشر ندفع جانبه بالسهاله
ولاني لتثويره من الناس قبّال
لكن إلى ركب الرشا بالمحـاله
واستثقلت ماني من الحرب ملاّل
نرسي كما ترسي رواسي جبـاله
ما تنهزع من وطي حافي ونعّال
ومن عاف صافي الماء وكدّر زلاله
أسقيه كدرٍ لين يروى ويكتال
وإن زاد زدنا له بقوّ وغثـاله
بحيل من لا في قواضيه محتال
وخلاف ذا ياللي تودّي الرساله
في صفح مصقولٍ عليه القلم سال
سلام منهو له على شفّ بـاله
ومشاهد اللي للثقيلات حمّال
غشّ الحريب اللي براسه صعـاله
عز الضعيف وريف ضيفه بالأعجال
بالجود يتعب من يعدّد خصـاله
كل المراجل حاشها دقّ وجلال
سلّم عليه ولا تقل له مقـاله
ألاّ إن نشد عني وعن حالتي سال
وقال أخبرن عن صاحبي كيف حـاله
عطه الجواب اللي كتبنا والأمثال
قل له يقول لك يا خلف من غـداله
من الحيّ والميّت من العمّ والخال
ركبوا على عوص النجايب عيـاله
يبرى لهم يابو سمي كم خيّال
جوه الضحى يا شيخ ماهي نطـاله
وصادوا لما رادوا على كل مشوال
يوم الخطوط أقفت وهو ما قـراله
جاه المقرّي والحق الأول التال
هذاك حقّ الملك ياللي عصى له
من عقب ما دزيت له كم مرسال
عيّا يطيع اللي نصيحٍ حكـاله
فرحان وابن سبيت ما ألقى لهم بال
ولا طاع يدّي ركبنا مع جمـاله
وأزريت من كثر الشكاوي والإرسال
يبي يردّ اللي مضى من هبـاله
واللي مضى عوجٍ سراميد وطوال
زادوا وبادوا من هبايب شمـاله
كلٍ له الله يوم تحسيب الأعمال
ويمناي ما ترضى بزايد شمـاله
وأعطي الحقوق أهل المعالي والأرذال
والله يالولا يوم كربة حبـاله
خوفك وغيضك أن نزيده بالاشعال
ومن عقب شيمتنا تبدّل فساله
يا شيخ يا تالي كريمين الأسبال
ونشوف حرب اللي يباهي بـمـاله
حتى نشوف اللي على الحرب صمّال
شكيت دقّه قبل يلحق جـلاله
هذا كلامي لك ولاني منه ذال
ومن خالف أمرك لو صديقٍ فأنا له
من أوّلٍ طاعون واليوم سلاّل
السيف للتايه ستاده حنـاله
وندلّ به منهو عن الدرب ميّال
وليا كبا حدّه محشنا صقـاله
ولا هو من الشطّات والضرب كلاّل
فإن كان ما شافوا توالي فعـاله
وصاروا بقاياهم فذولاك جهّال
وعبيدٍ اللي لا عدمنا خيـاله
حطّه لهم مولاي نجمٍ وزلزال
هذي علوم ديار من لا صفـاله
مشروب ماء ألاّ بتقصيف الآجال
صفّيتها بالسيف ما هي جمـاله
وثنيت للرثاع بالقيد وعقال
ولا نفوز ألاّ ونروي سلاله
من دمّ هامات العدا عَلّ وانهال
هرجٍ قليلٍ لا تكثّر جـداله
قلبك دليلك لا تفكّر بالأقوال
والصدق يشهد له وغيره رزاله
وقولٍ بلا فعلٍ إلى قيل بطّال
من قال قولٍ ترجمت له فعـاله
لا عاش من يقصر منه قدر مثقال
شهودي بجلدي والعدو به بـداله
والناس تدري بالجدايد والأسمال
فإن كان تبغى اليوم نقصر طـواله
اعزم ولا تنظر لراضي وزعّال
دنياك تظهر من خوافي ليـاله
ولا تكن من عقب ما قلت غفال
وصلاة ربي عِدّ ساعٍ سعى له
وما التجّ حجٍّ بين هذيك الأميال
وما تجهول فوق الأنضا رحـاله
على نبيٍ خصّه الله بالارسال



اخواني واخواتي اتمنى ان ساهمت معكم بالشيء المفيد وان شاء الله ستتواصل المشاركات في هذا المنتدى

تقبّلوا فائق التقدير ..
( ملاحظة : هذا القصيدة اطلعتكم عليها وهي من اوراق ديواني تحت الطبع )