أعرف إنك بديت الحرب من نفسك وأعرف أنهيك

بلاش تعيد وتزيد السوالف .. وأنت مايمديك
طريقك صعب وأحلامك بعيدة والغرور أعماك

تعاتب وأنت ماتدري خفوقي وش كثر معطيك
على كثر العطا حديت قلبي للفراق,,,,, وجاك

صحيح اني سمعت بطاري المووت ولمحته فيك
ولكن قلت ابسري لك واغني لك على ليلاك

وجيتك حب عن كل القلــوب العاشقـــة يغنيــــك
أصيح ( القلب مايغلى عليك وماتبي يفداك)

عقب ماانهد حيلك والهوى جابك على مغليك
بدا المشوار واللي باقي من عمـري بدا وياك

لقيتك ظامي إحساس وقصايد قلت أجي وأسقيك
ابكسب فيك أجر والا القصايد فيك وبلياك

تصور من كثر ماأردد أسمك لاطرى طاريك
أصوّت لك على الطاري بلا وعي وبلا إدراك

مشينا بالغلا لا خوف ياخذنا ,,, ولا تشكيك
وفجأة من ردى عقلك طغيت وغرتك دنياك

قسى قلبك وماتدري بعد ,,,,وين الله موديك ؟؟
تبعتك لآخر الدرب الطويل وماقصرت خطاك

أحاول فيك ,, أهدي فيك ,, وأدري مالله بهاديك
مع اني صرت أحاول لين جبت أولك وأتلاك

نصحتك وأكتشفت ,, أن الوفا بالذات مايعنيك
أجل ذنبك على جنبك ,,,, على ماتفعله يمنااك

أعرف إنك بديت الحرب من نفسك وأعرف أنهيك
وأعرف سلاحك الفتنة الى منّك وصلت اقصاك

تلمّح بالجفا ,, مدري وش اللي بالجفا يغريك
عسى الله مايحدك للجفا يمي ,, ولا يبلاك

تولّم للفراق ولا تفكر ترجع لماضيــك
وحرام ان ماجعلتك تصفق اليمنى على يسراك

أنا ماأقول كلمة وأرجع أسحبها ,,عشان أرضيك
مدام رضاك في كسرة كلامي , لا, بلاش رضاك

ترى ماني صبي أهلك عشان أخضع وأبوس ايديك
عسى تنهيني الدنيا لو أخضع وأضعف لشرواك