الشاعرة / وضحى العوّاد
شاعرة لا يختلف عليها اثنان بقدرتها على صناعة البيت ذا الممعنى و الدلالة القوية .. .. و تصيغ مفرداتها بشكل أكثر من رائع .. و لها عدة قصائد جميلة و قوية و ذات معنى ..
اخترت لكم بعضا من ابياتها ,,
ونبدء بهذه الابيات وقصتها :
وضحى الدخيل العواد تركت الشعر وكان ابن أخيها
سعد السعود العواد يحب زيارتها بين وقت وآخر ويلقي على مسامعها البيت والبيتين وهي لا تقول شيئاً ، وذات يوم قال
لها عندي قصيدة إن رديتي عليها فعندي لك حق
ورأت وضحى أنه لابد من كبح جماحه ،
فاستجابت وقالت : هات ما عندك فقال القصيدة
الآتية ولما انتهى دعت أحد الأولاد فأملت
عليه الرد وسنبدأ بقصيدة سعد أولاً ،
قال سعد السعود مسندًا على عمته وضحى الدخيل العواد :
أمس القدم في مَرقَبْ أهل الشقا نط
ووسَّمـت لـك قـافٍ علـى أط وآطــا
من لايعرف الغوص يبعد عن الشط
خلـلّـي نـغــاص بغـبـتـه وانتـبـاطـا
أصير أنا وإياك فـي الشيـل والحـط
كانـك علـى خبـري بفكـرك نشـاطـا
جفنـي ليـا جـا الليـل بالنـوم ماغـط
وأنتـي جفـونـك كــن فيـهـا خيـاطـا
وَجْـدي وجـود أسـيـر قــوم مـربـط
قامـوا يسوطونـه بصِلـف السيـاطـا
إن صــاح جــلاده بـجـلـده تـسـلـط
وإن زاد تعـذيـبـه يـزيــد الـعـيـاطـا
مـن قـام مثلـي عـن مكـانـه وفــرط
مـاعـاد بالـرحـمـة لرجـلـيـه مـاطــا
إليـا حكـى مـا عــاد يـمـدي تــورط
وإليـا سكـت مـافـاد كـثـر الصبـاطـا
مـن عجـز لايرقـى الطويـلـة يلـقـط
من حوضها من تحت يلقى البطاطا
شـريـت شــي صـاحـبـه مـاتـشـرط
ولاعـن المقـسـوم خــذت احتيـاطـا
ولاي في وسط القشر سابقـي عـط
هــذا الصحـيـح ولانـويـت الغـلاطـا
وردت عليه عمته وضحى بالقصيدة الآتية :
يادخيّـل قــم دنّ حـبـرٍ مــع الـخـط
واكتـب سلامـي وأحكمـه باحتياطـا
خـبِّـر ولــد عـمـك وقــل لاتــورط
ماينـفـع الـرجـال كـثــر المـطـاطـا
وإليا وصلته قل عسى الوجه يلهط
لو عسّر الطـاروق نرقـى اللطاطـا
بيـوتـنـا مـثــل المخـابـيـط تـنـقـط
مـن كوكـبٍ مثـل البـحـر مايهـاطـا
كان أنت قوماني فانا أقول لـك وط
ألحقـك لـو دونـك عسـام وغطاطـا
ماشيل فوق الراس لازم يبـي حـط
يقعـد بوسـط الـدار فــوق البـلاطـا
تـقـول لــي لـكِّـن جـفـنـك مـخـيَّـط
ليتـك نشـدت المطرحـة والبسـاطـا
لكـنِّ يضـرب ناظـر العيـن مخـيـط
وإن جيت أغمض كن فيها حماطـا
مايـنـفـعـك زادٍ لــيـــا مـاتــخَــرَّط
يقطـعـك يــازادٍ بـــدون انـخـراطـا
كان أنت ترجي لـك خمـاجٍ ليـا بـط
عــزَّ الله إنــك مـهـمـلٍ بانـفـراطـا
النـاس تجنـي مـن ثمرهـا وتحتَـط
تلقـط مـع التفـاح خــوخ وطمـاطـا
وايضا
رأت في يوم من الأيام أن الدلة
مركات على النار إلى جانب قدر الطعام فقالت على لسان الدلة
الدلة :
عقب ماهو مركبي قدم الرجالي
قمت انقّل من محل اليا محلـي
صرت من حسبة قدورك عزتالي
ول ياعصر الفَلَس جعلك تولـي
وضحى :
اصبري في صبرنا والعمر بالـي
آه واويلاه ياعصور مضـىً لـي
ما جرى لك يادلالي قـد جرالـي
والليال اللي مضن لك قد جرىً لي
الدلة :
يوم انا محشومةٍ قِدمِي مزالي
ونجر ماوٍ يدعي الغادي يدلي
ما حلا الفنجال بايمان العيالي
بين شيبانٍ وشبـانٍ تسلـي
وضحى :
ياعزيز الشان يا منشي الخيالي
ارحم اللي دمعته دلـت تهلـي
كيف هيضتي جروحي يا دلالي
اسمعـي يادلتـي والا فولـي
الدلة :
ما سمعنا لك وعنـدي لـك نكالـي
باشتكيكـم والمحاكـم لـي تحلـي
كيف يام حسين ما ترضينهـا لـي
كيف اشوف الغبن واسكت واستهلي
وضحى :
الشرايع ما تقول الا العدالـي
وكل ما قالت بشرعه جايزٍ لي
وان شكيتيني هجرناكم ليالي
من ابريق بالترامس نا نزلي
الدلة :
الترامس ذوقها ما هوب حالـي
واعسى كل الترامس فدوةٍ لـي
إشري الرسلان لو هو كان غالي
واركي الدله وبالرسـلان زلـي
*********************
اتمنى ان تنآل رضآكم
ودي ,,
العضو الأكثر نشاطاً هذا اليوم 
العرض الشجري
