الفقــد هو الوجه الاخر للـ ...؟

الفقد...هو الوجه الآخر للموت....الغرق...هو النجاة من الحياة !!
:

هنا..واهتز غصن الليل بعيوني وطار نعاس
.............. هنا للوحشه اكثر من ثلاث ارباع هالليله ..!

وربع برواز..علقته لصورة واحد من الناس
.............. كأنه في سما الجدران..برق وعيني اتخيله ..!

وكأني من كثر ما اتخيله طفل وعديم احساس
.............. يحيرني.. مابين الله يهداه...وآه يا حليله ..!

وحشني لين صار الدمع حبر..وخدي القرطاس
.............. وعلى وجهي كتبت احلى قصايد عن مناديله ..!

هي الغربه..وليل الشامتين اللي بلا حراس
.............. إلى مروا.. وعاثوا في بلاده... وبتفاصيله ..!

وهو غايب..ويدري وش يصير بغرفتي من ياس
.............. ولكن... مايشوف الا بنظارة...عواذيله ..!

وانا ياما عشان ارضي طموحاته خذيت الفاس
.............. وحطبت احلامي الخضرا لبرده..ولقناديله ..!

وصبرت شهور حتى صارت عروق الحشا يبّاس
.............. وتحت هبات الانفاس الشماليه..دفا ليله ..!

وخلاني على وجهي سؤال وفالذهن هوجاس
.............. ياكيف البس جفاه بخافقي وارمي مواصيله ..!

وانا ادري بالمحبه لاطغت واحتلت الانفاس
.............. يصير الموت راحه..والحياه تصير وشي له ..!

مغير الانتظار يجمّع الساعات..والوسواس
.............. على رف السنين الضايعات وقلة الحيله ..!

وهنا..من حبك تصير المعزّه في خضوع الراس
.............. وهذي.. مابها رجال صامل...او ولد عيله ..!

وانا قد ذقت لذه للخضوع..وماعليّه باس
.............. وذقته يوم قالولي جروحك ذيك..منهي له ..!

وهنا..بنتٍ تهز الليل بعيوني..يطير نعاس
.............. هنا للوحشه اكثر من ثلاث ارباع هالليله ..!