بسم الله الرحمن الرحيم ...[المجنون والحظ : قصة من حلقتين ..جميع احداثها تخيلية , واي تشابه بالاسماء او الاشخاص او الوقائع : تشابه غير مقصود ..وبرجاء حفظ الحقوق ] كتبت الاسبوع الفائت في خميسيات عن الحظ ...ووعدت بإستكمال الحديث عنه ....وقبل يومين سألت احد اصدقائي (والذي كان زميل دراسة ايضا)عن الحظ والنحس والمحظوظ والمقرود ؟؟ فقال لي: انك لن تجد ابشع من قصة سليمان الراشد مأساة سببها سوء الحظ ونحس الطالع وقرادة البخت والنصيب !!فقلت : من سليمان الراشد ؟؟ فقال : سليمان عبدالله الراشد ..زميلنا ياشيخ ..سليمان الراشد ابو كوية ..ياشيخ.. سليمان ختم "سوجا" ..!فقلت مقاطعا : ااه ..ختم" سوجا" , سليمان ..ذكرته ,ااايواااالله سليمان , وش بلاه ؟؟ اخبره تخرج بإمتياز علمي ومعدل 99%..وهذاك علمي به ؟؟فقال صديقي : صح تخرج الرجال ممتاز علمي و99%وكسور بعد.. وراح وقدم على الطب ..فقاطعته : عاد اخبره يموت بشئ اسمه طب, اصلا كنا نسميه الدكتور سليمان ..يااااالله ايام..ااايه وبعدين ؟؟ فقال صديقي : ياخوي وراك مشتغلني مقاطعة كل ماحكيت ..ياخوي خلني اكمل سالفتي ..انت ماتسمع بالمثل اللي يقول "إتفل بوجه الرجال ولاتقطع سالفته "؟؟!! فقلت ضاحكا : قرب وجهك الله لايهينك ..هاهاها ..اااسفين يارجال يالله كمل, بس انت رجعت ذكريات الدراسة . فقال : المهم يابو الحبيب ,الرجال قدم طب , وطلع اسمه مع المقبولين , ودرس الترم الاول , وماكمل من الترم اسبوع او اسبوعين إلا ويستدعونه عمادة القبول والتسجيل بالجامعة ..وقالوا له :اسفين ياخوي , انت مقبول بالغلط , حدث سوء تفاهم وتشابه اسماء وترى المقبول فعلا طالب ثاني اسمه سليمان عبدالله الراشي وهذا ملفك , وضف وجهك . فقلت مقاطعا : معقووول الكلام هذا ؟؟!! طيب وش صار عليه ؟؟ قال صديقي : يارجال معقولين , اصلا السلفة مدبرة وطلعت حقيقة المؤامرة مثل ماسمعت إن الواسطة مع سليمان الراشي , والربع اللي بالجامعة ماانتبهوا لتشابه الاسماء هذا فركزوا جهدهم ونظرهم مع خوينا الراشد , واصلا هو ماهو محتاج واسطة : درجاته عالية , ونجح بالامتحان التحريري , والمقابلة وعدى , وهم مركزين معاه ويقولون : ماشاء الله , هذي الواسطة اللي ماتحرج وينواجه بها , واااثري خويهم الراشي رايح بالرجلين , لادرجات تبيض الوجه , ولامقابلة زي الناس , وأكسوا عليه * مايدرون انه هو المقصود بالواسطة ...ويوم طلعت النتائج وارتفعت الاسماء واعتمدت , ودخلت الناس ...حاسهم الراشي ..وعرفوا غلطتهم فاضطروا انهم يطلعون خوينا ويدخلون الراشي . قلت (وانا في قمة الاندهاش ) : طيب ياخوي حرام والله ؟؟!! معقول ياناس ؟؟!! طيب ياخي يدخلون الراشي ولايطلعون خوينا ؟؟!! قال : يارجال انت عارف عدد كراسي الطب محدود والاسماء تم اعتمادها وارتفعت , ولايقدرون يدخلون الراشي الا بهالطريقة , وبعدين الظاهر ان "ختم سوجا " يوم قام يشكيهم ويتهمهم بالواسطة وكذا... : زاد عنادهم وقالوا : إن تراجعنا ودخلناه انكشفت الامور ومالنا إلا نصمم ونصمل كأنه فعلا خطأ وتشابه اسماء !!قلت : طيب ياخي وش ذنب خوينا ؟؟ يخلونه لايطردونه !! قال : يارجال مثل ماقلت لك , وبعدين إن خلوه ماصار فيه مبرر لدخول هذاك وانكشفوا . قلت : أخس يالراشي ..حسبي الله عليك ! هذا ماهو بسيط ؟؟ قال (مقاطعا ) اقصر حسك وش بلاك ؟؟الظاهر ذاكرتك بوشت !!انت ماتعرف الراشي ؟ الراااااشي !!!انت ماتشوف تلفزيون ؟؟ماتسمع رادو ؟؟ ماتقرا جرايد ؟؟ماانت عايش بالسعودية ؟؟؟قلت : ااايه ..الراشي ..بس بس ...وانا اقول ...مقيوله : " إذا عرف السبب بطل العجب " إلا يحوسون الدنيا ماهو الجامعة علشان يدخل ولد الراشي ..طيب وخوينا وش صار عليه ؟ ليه ماتكلم ؟ ليه ماتظلم ؟ قال : اقول لك ماخلى شي ماسواه , برقيات وخطابات وجرايد ..لا..وشق جيوب عند الوزراء والامراء , ويواعدونه خير ..وشرح على هالمعاريض ..وإن شاء الله... وخير... .والترم الثاني ..واللي بعده ..ابد.... نفس" حزيمات هريهرا" مادري" تريترا" والسنة الثانية ..والثالثة ..ياما قالوا له :انت ماتقبل لانك ماانت خريج هالسنة !! قلت : إنا لله وإنا اليه راجعون !! طيب ..غير هالطب الملوي ؟..جامعات ؟..كليات ثانية؟ قال : الرجال معلق بالطب ..أنت لوتدري هالحين وش صار عليه كان تبكي !!! قلت(بلهفة ) : وش صار عليه ؟؟ قال: انا سمعت أن الرجال هالحين جته لوثة بالعقل ..اختل ...انسفه ...واذا كلمه احد باسمه يقول : لاتقولون سليمان , انا الدكتور سليمان اخصائي جراحةعامة ..قلت ( وانا اصفق يدا بيد متحسرا ) : إنا لله ...ياوااالله المصيبة !! معقول هالكلام ؟؟ يعني شفته انت ؟ قال : لاوالله ماشفته شوف ..بس سمعت ان حالته هالشكل . قلت : ياشيخ يمكن اشاعة , اصلا تخبره انت , هو مربوش خلقه من العبقرية اللي يشوفه ولايعرفه يقول هذا ماهو صاحي ...تدري عاد ...انا ابروح يمه ...قال ( مقاطعا) : انصحك لاتروح . قلت : ليه ...هو يؤذي ؟؟!! قال : ماادري بس ...وين تبي ؟؟ قلت : إلا اروح واذا كان هو عاقل اسلم عليه , واذا هو مجنون ادعي له بالشفاء ! وين هو ساكن ؟ هو تزوج ؟ قال : حسب ماسمعت على حطة يدك ماتزوج , وغير سالفة هالاختلال ماسمعت شي ..وللان حسب معلوماتي ساكن عند جدته بحي العزيزية ...تخبره ..بيته الاول يوم كنا نوصله ؟ قلت : والله اني شبه ناسي ..اذكر طشاش ..بس وصف لي اوكد إلا إذا تبي تخاوي ؟؟قال : لا والله ماني رايح , ابي اوصف لك , بس حسب ماسمعت .. يقولون: لاتفتح معه سيرة قصته ولاتجيب لها طاري . تراه ينفعل ...انتبه !!!! وفعلا وصف لي خويي بيت الرجال , وعدت الى البيت وأنا اتفكر في هذه القصة العجيبة مابين مصدق ومكذب !!!ورجعت بذكرياتي الى الوراء , الى ايام الثانوي ..ياسقاااها الله تلك الايام , والى سليمان الراشد "ختم سوجا " , كان ذاك الولد عبقري بكل معنى الكلمة , خليط "كوكتيل " من كل العلوم : دين , لغة عربية , انجليزي , وثقافة عالية: علمية , وأدبية وشعرية , يحفظ شعر ويكتب بالفصحى والعامي ...والطريف انه مرات تمسك عنده احيانا على الفصحى ويقعد يتكلم بالفصحى شهر او شهرين مع كل الناس حتى يقولون مع جدته بالبيت, اللي ساكن عنده بعد وفاة والديه , يعلقون :يقولون : دق عليه واحد باب البيت يبيه , ردت جدته من وراء الباب : من الطارق ؟؟ ويافكت الحالة ..رجع طبيعي ..واحيانا يخلط بين الفصيح والعامي ...المهم ذاك الولد موسوعة تمشي على قدمين..ونكتته حاضرة , ونبهته سريعة ...وفوق كذا راعي فضل على شلتنا ..كان يغششنا بالاختبارات ....المهم اني جزمت اني اروح من بكرا له ...وفعلا من باكر توجهت الى مقابلة "ختم سوجا" وختم سوجا هذا هو لقبه عندنا وله قصة : فهناك على جبهة سليمان علامة فارقة وماركة مسجلة : كوية (كي ) في منتصف الجبهة تماما ..وسوجا هذي اسم العجوز الطبيبة اللي كوته وهو صغير مع جسمه ثم ختمت بختم الجودة : ختم سوجا مع الجبهة , ولذلك كنا نمازحه وملقبينه بهذا اللقب. رحت الى بيته ...ودقيت الجرس ...ست سنين من تخرجنا وعلمنا ببعض !!ترى هل سيتعرف علي ؟؟ حتما سيتعرف علي ...ست سنين مده ماهي بعيده ...أو تراها بعيدة ؟؟ إلا واالله عمر . بس انا الظاهر ماتغير شكلي حيل ؟ هيييه أو تراني تغيرت ؟؟ وبينما انا وحديث النفس هذا.. ..إذ فتح الباب ختم سوجا بشحمه ولحمه ...عرفته فورا ...ناهيك عن ملامحه التي ميزتها فورا , فهاهو ختم سوجا في محله : في منتصف الجبهة تماما ...لكني لاحظت فورا ان وجهه قد نحف جدا واستطال وبرزت عظمتا وجنتيه , وعينيه غائرتان , وتشعان ببريق غريب ...وكأنه بريق احمر , خيل الي في تلك اللمحة والوقفة اني لاأرى لون عينه الابيض ولا البؤبؤ الاسود بل كأن لون العين كله احمر ...لاأستطيع الوصف تماما ...الحقيقة سرت في جسمي قشعريرة ..وقبل ان اتكلم بادرني قائلا :......[.يتبع>>>>خميسيات القادم ان شاء الله الحلقة الثانية والاخيرة ] والسلام عليكم ....وتقبلوا حبي
العضو الأكثر نشاطاً هذا اليوم 
العرض الشجري
