إصبر علي منصدم روحـي بأجمّعهـا
..................أبطلق أبهام هذا الغبـن مـن نابـي
إصبر علي باقـيٍ دمعـه بأودعهـا
..................من سجن عيني تروح وفدوة أحبابي
لو كان عيب الرجال يهـل مدمعهـا
..................لكن وشأقول خـان الدمـع بأهدابـي
حاولت أكابر بها لكـن نـزل معهـا
..................مع الأسف من حسبته صفوة أصحابي
أسكـت تراهـا كبيـره لا ترقعـهـا
..................شف خنجر الغدر بيدك ويش سوّابي
شف دمي اللي عليه وشوف موضعها
..................لله درّك منيشـن صـح لأعطـابـي
كنت أذخرك للسنين وسـوء طالعهـا
..................وشلون قبل العدو خنجـرك يبدابـي
دع عنك روحي ودع عنّك مواجعهـا
..................يطيب هالجرح ولاّ عمر مـا طابـي
في خاطري كلمتيـن أبيـك تسمعهـا
..................قبل أتوكّل على الله وأعلـن غيابـي
الروح هذي وطـن خضـرٍ مرابعهـا
..................وأطهر من أنك تدوس برجلك ترابـي
ولو تغرب الشمس بعيوني لمطلعهـا
..................ما أفتح عقب طعنتك للخـوّه أبوابـي
المشكله مو سنينـي كيـف أرجعهـا
..................المشكله كنت أحسبك صفوة أصحابي