يعين الله على دفع البلآء..؟؟

يعين الله على دفع البـــلا ، بالزند والساعد
وعلى الدنيا يعين اللي خلقها وقّدّر مصابي

إذا هي بالمروّة ، بالمروّة جيتها صاعد
وإذا هي بالدقارة ، مالها درب على بابي

لياليها مثل قدر الخلايق ناقص وزايد
تطيّرني فرح نوبة ونوبة تحرق أعصابي

أطاوعها ليا طاعت وإذا ما طاعت أعاند
ولاعندي بها .. دنيا ولا تستاهل إعجابي

أنا والموت من حزة صراخ الطفل متواعد
ولافكرت بأهْله ، والعمُر ماهو من حسابي

ولا يزعجني إجحاف الغمام وبرقه الراعد
ولا توجعني أسوار الكلام وكثرة غيابي

ولا أزعل على من يخلف الميعاد ويواعد
ولا أرضى على قلبي أبد ، لو يظلم أحبابي

بلا هذا التساؤل في عيونك ، كُف يا ( ماجد)
أشوفك عاتب النظرة ، تعال وكفكف عتابي

تعـــال آريّحك مادمت لا مقفي ولاقــــــــاعد
تعال أشرح لك اللي صابني من شلعة اطنابي

لعب فيني الهوى ياخوك وتيار الهوى كــــايد
وعزالله ..مامثـــل الهــــــــــوى جلاّد وارهابي