وش لذة الدنيا ليا غابوا احباب ..

في كل يوم يغيب عن عيني اصحاب
ما اشوفهم ثاني سوى في حلومـي

كلٍ يروح وكل فرقـى لـه اسبـاب
ما غير خـلاًق العبـاد معصومـي

من مات مات ومن حيا بات منصاب
بين التوجـد والسهـر والهمومـي

هذا بحادث راح معه الونس غـاب
والآخر ايقض بـس عيًـا يقومـي

ونظرت حولك جل من حولك اغراب
صقرين يمكـن والبقيـه رخومـي

وبديت تحسب للقدر ميًـة حسـاب
لامن ذكـرت ان المعاليـق تومـي

وين المهار ووين طلقين الاشنـاب
وين الذي لاسـرار قلبـك كتومـي

وين الذي شالك على روس الاهداب
وين الذي قلبه نظيـف و رحومـي

وين الذي ما كدًرك يـوم واغتـاب
وين الذي لا نمـت قبلـك تقومـي

وين المهاة اللي تنسيـك الاتعـاب
لاشافتك تعبـان عجـزت تنومـي

تسهر لجل عينك ولا تبدي عتـاب
تطبخ غداك وهي قدرهـا تصومـي

قبل الدوام تودعك في ذرى البـاب
تقول حاسـب يابعـد كـل قومـي

وش لذة الدنيا ليا غابـوا احبـاب
يا شين لا جا يوم صرت معدومـي

آمنت با اللي للبشـر نـزًل كتـاب
مالي برجوى غيـر ربـي لزومـي

الموت حق ويجرعه شايب وشـاب
قانع مدام الله هـو اللـي يدومـي



أحمد الجريفاني

...


اعجبتني وحبيت انقلها لكم


تحيتي