مزيون حايل ..

مرحبا بالجميع ..

من زمان عن المنتدى.. واتمنى بطيب كرمكم تعذروني .. لأني انشغلت كثير بالعطلة.. وحتى الاجازة الي خذيتها صرت اقرب مايكون معقب بالدوائر الحكومية.. كنت ادخل الاقسام وفطوري معي.. من ضيق الوقت ..

وصراحه مشتاق لكم جميعا.. بدون استثناء.. ولكم وحشة بالقلب والله..

العطلة هذي مرورها السريع خلاني اتذكر شريط حياتي.. فعلا الايام تمضى من عمرك بسرعه وانت مو حاس فيها..

بس اني توقفت مع لحظات كانت رائعه مع مزيون حايل في حارتنا يوم كنا صغار.. حتى كلمة رائعه قليله عليها.. والسبب ان مزيون حايل كان محلي هالذكريات..

بكل صراحة مزيون حايل كان احلى شي بحياتي.. وحتى الكلمات اذا جت سيرته صارت تلبس ورد.. وتغير لونها للأحمر من خجلها.. لأنها صعب توفي وتاصل مقام هالشخص..

يوم كنا صغار .. من جماله حسبته بنت.. كان لون بشرته شي ماينوصف.. وشعره اشقر وله قذله طويله.. وكنت اقول لامي ابي بنت جيراننا.. قالت ياولدي ماعندهم بنت.. هذا ولدهم .. ماصدقت لين صار عمري سبع سنين وشفته بالمدرسه..

كانوا يسمونه الليل.. والسبب انه يطلع في الليل بس.. خايف من عيون الحساد والبنات.. كان كل شهر بنت منصفرة.. ومغشي عليها.. ومحد يعرف السبب.. لكن بما ان حارتنا صغيره.. عرفنا بعدين ان اي دوخة بنت بسبب الليل.. اكيد شافته ..

مرت الاسام وكنت احاول بس اتقرب لليل.. لين جيته وبقوه قلت الليل.. طلبتك شي.. قال ابشر.. وعلى فكرة الليل فيه ميزه .. اذا قلت له طلبتك قال ابشر.. وضرب على صدره.. معناه طلبك تم.. تمنيت كتبنا العربية اذا ودهم يوصفون شهامة العرب.. وفزعتهم ياصفون الليل وبس.. لأنه شخص استثنائي بكل شي..

قلت له ابي اصير صديقك.. ومن يومها ولله الحمد ماتفرقنا.. قلت له مره وش رايك نروح للسوق بكرا.. قال ليه.. قلت طلبتك قال تم..

المشكله صعب تااصف حسنه الليل.. شي اقرب للخيال من صدقه.. كانت عيونه من حسنها.. بس نرسمها على صفحات دروسنا.. طلته تقول للقمر ابعد.. انت تسرق نورك والليل منبع النور.. هيبته هيبة ملك.. مشيته تسعد العيون اللي تناظره.. ولا تكلم.. تتعب وانت تقول ماشالله


رحنا للسوق وانا اقولكم الصدق.. ابي البنات اذا شافوه يعطوني وجه لأني صديقة.. وفعلا دخلنا السوق وياليتنا مادخلنا.. يالله سبعين دوريه فكتنا وطلعنا سالمين.. اذكر بنت قالت له.. اللي تكفى كف.. قلت لها بلقافه ليه.. قال ابي واحد حلو يضربني بس.. وغير التضاهرات اللي صارت قدامنا.. شي ماينوصف..

بعد الثانوية رحت للشرقيه.. واول ماجيت اهديت له البيت ..:

تدري وش اللي يذبح القلب يالليل...
..... لا صرت سني وحبيت بنت شيعة ..


رد علي ببيتين وقال :

انتبه عن طريق ربعك لا تميل ..
.... وحب من دون عقل تكفى بيعه ..
ورح لمكة .. واطلب الله حيل ..
.... يبعدك عنها والعمر باقي ربيعه ..

الله يالليل.. ما انسى محلات ابل بااي.. ولا انسى بعبع.. والاكسترا اللي كنا نسويها بقيادة ابو صالح.. ولا يوم نلعب الكورة.. يومها حسيت ان حتى الكورة تحب تغازلك.. وبس تجي يمك.. مره مأموره ومره بكيفها ..


نزلنا مره من تاكسي.. داخلين الجامعه.. وقتها كان الليل طربان ويغني.. شوي إلا تعدينا الجامعة.. قلت ياريس لف يمين.. قال الله يخليكم.. دخل اليوم لكم.. بس خلوني اسمع صوت خويك.. بوقتها اللي كان يردد اغنيه اشوفك وين يامهاجر..قلي بأي بلد صاير ..


ودي اطول.. لكن اخاف انكم تملون.. وصدقوني ماجيت امدح بالليل.. لأنه هو يرفع الكلام اللي نكتبه..ويزينه ..

بس انا كنت ناوي اكتب صفحه من ذكرياتي كل ماحصلت وقت.. احداث كثيره صارت لي وحبيت تقرون معي احداثها واشوف رايكم فيها.. بس وانا اراجع شريط ذكرياتي لقيت ان الليل هو اجمل صفحة.. واحلاها .. بالإضافة لابو صالح .. وبما ان مزيون حايل ( الليل ) مشرف القسم.. حبيت انزل اول موضوع لي بقسمه ..


تحياتي للجميع ..